Vatnaveiðin víða góð þessa dagana

Flestir sem við heyrum í eru búnir að eiga gott sumar við vötnin og þá sérstaklega síðustu tvær til þrjár vikur. Vötnin á höfuðborgarsvæðinu hafa verið að gefa ágæta veiði en best virðist hún hafa verið í Þingvallavatni síðustu daga og þar hefur svæðið við Arnarfell verið mjög drjúgt.

Það eru einnig að berast fínar fréttir af veiði í Úlfljótsvatni, Meðalfellsvatni þó fiskurinn þar geti verið smá, Hraunsfjörður er búinn að vera mjög fínn og suma daga er mikið af bleikju að sjá í vatninu og einnig má nefna Hítarvatn en besti tíminn þar er yfirleitt hásumarið. Veiðin á Skagaheiði og Arnarvatnsheiði er að sama skapi búin að vera mjög fín upp á síðkastið. 

Ef þetta sumar verður slakt í laxinum geta veiðimenn landsins alltaf skotist í skemmtilega vatnaveiði en listinn af skemmtilegum vötnum um allt land er mjög langur og vötnin breytileg eftir því.