Diljá Ýr skoraði í stórsigri á Kristianstad

Fyrir leik kvöldsins var Häcken í öðru sæti deildarinnar með 20 stig en Kristianstad sæti neðar með stigi minna. Annað sætið var því í húfi.

Diljá Ýr Zomers byrjaði á vinstri kantinum hjá Häcken en Sif Atladóttir og Sveindís Jane Jónsdóttir voru báðar í byrjunarliði Kristianstad.

Lið Häcken byrjaði betur þar sem Johanna Rytting Kaneryd kom liðinu í forystu þegar hún fylgdi eftir langskoti sem varið var út í teiginn á 12. Mínútu. Aðeins tveimur mínútum síðar tvöfaldaði Diljá Ýr Zomers forystu Häcken þar sem hún var alein á teignum og afgreiddi vel. Diljá Ýr fékk svo svipað færi síðar í fyrri hálfleiknum þar sem vörn Kristianstad var aftur ansi tætinsleg en skot hennar hafnaði í stönginni.

2-0 stóð í hléi og Häcken leiddi sanngjarnt þar sem gestirnir frá Kristianstad voru langt í frá líklegar fram á við. Kristianstad fékk hins vegar gefins líflínu þegar Milica Mijatovic skoraði klaufalegt sjálfsmark eftir hornspyrnu sem breytti stöðunni í 2-1 á 65. mínútu.

Stina Blackstenius drap hins vegar vonarneista Kristianstad með marki aðeins tveimur mínútum síðar og Emma Kullberg kom Häcken 4-1 yfir stundarfjórðungi fyrir leikslok. Emma Petrovic minnkaði muninn í 4-2 fyrir Kristianstad á 85. Mínútu en Stina Blackenstius var ekki hætt. Hún skoraði annað mark sitt á 90. Mínútu og það þriðja í uppbótartíma.

Lokatölur 6-2 fyrir Häcken sem eru nú með 23 stig í öðru sætinu, fimm stigum frá toppliði Rosengard, en Kristianstad er með 19 stig í þriðja sætinu og er í hættu að missa þriðja sætið í hendur Hammarby sem er með 18 stig sæti neðar og á leik inni.

Þá lék Andrea Mist Pálsdóttir allan leikinn fyrir Växjö sem tapaði 2-0 á heimavelli fyrir Eskiltuna. Växjö leitar enn síns fyrsta sigurs og er með þrjú stig á botni deildarinnar, sjö stigum frá öruggu sæti.