Elliðavatn opnar á fimmtudaginn

Vatnið er eitt það allra vinsælasta á höfuðborgarsvæðinu enda stutt fyrir íbúa svæðisins að skella sér í veiði hluta dags eða allann daginn. Veiði í vatninu er góð en þar er með mestu leiti urriði en einnig er þar bleikja sem þó var mun fjölmennari í vatninu á árum áður. 

Vorveiðin getur verið virkilega góð og þá helst ef menn eru að nota litlar straumflugur og veiða djúpt. Það hefur reynst mörgum ótrúlega vel að nota sömu straumflugur og hafa verið að gefa vel í vorveiðinni í Þingvallavatni og þó svo að það sé ekki mikið af stórum urriða í Elliðavatni, algeng stærð 2-3 pund, þá er ótrúlegt hvað þessir minni urriðar eru brattir í að taka stórar flugur.

Vatnið opnar fyrir veiðimönnum sem endranær á sumardaginn fyrsta næstkomandi fimmtudag og það verður líklega fjölmennt við vatnið ef veður verður sæmilegt.