Tíu manna samkomubann tekur gildi á miðnætti

Þá verður margvísleg starfsemi sem rúmast ekki innan fjöldatakmarkananna stöðvuð. Aðgerðirnar byggja á tillögu sóttvarnalæknis sem lagði til að gripið yrði tafarlaust til ráðstafana vegna fjölgunar kórónuveirusmita. Munu takmarkanirnar gilda um allt land og vara í þrjár vikur.

Að öðru leyti er um að ræða sömu reglur og tóku gildi þann 31. október í fyrra og voru notaðar til að kveða niður þriðju bylgju faraldursins. Þetta kom fram á blaðamannafundi ríkisstjórnarinnar sem fram fór í Hörpu. 

Svandís Svavarsdóttir heilbrigðisráðherra sagði stjórnvöld vilja leggja ofurkapp á að reyna að takmarka útbreiðslu hins svokallaða breska afbrigðis kórónuveirunnar sem sé meira smitandi önnur sem hafi fundist hér á landi. Þá hafi rannsóknir bent til að afbrigðið leggist í meira mæli á börn og ungmenni.

Helstu breytingar

• Almenn fjöldatakmörkun miðast við tíu manns og ná til allra sem eru fæddir 2014 eða fyrr
• Trú og lífsskoðunarfélög mega taka á móti 30 gestum
• Líkamsræktarstöðvum, sund- og baðstöðum verður lokað
• Grunn-, framhalds-, tónlistar- og háskólum verður lokað frá og með morgundeginum og þar til hefðbundið páskafrí tekur við. Unnið verður að reglum um fyrirkomulag skólahalds að loknu páskafríi á næstu dögum.
• Íþróttir inni og úti, jafnt barna og fullorðinna, sem krefjast meiri nálægðar en 2 metra eða þar sem hætta er á snertismiti vegna sameiginlegs búnaðar, eru óheimilar.
• Sviðslistir á borð við leikhús og sambærileg starfsemi, þar með talið bíó er óheimil
• Skemmtistöðum, krám og spilakössum verður lokað
• Veitingastaðir mega hafa opið til 22 með hámark 20 gestum í rými. Geta tekið á móti gestum til 21
• Verslanir mega taka á móti að hámark 50 manns, færri í minni verslunum
• Hársnyrtistofur, snyrtistofur og sambærileg starfsemi verður áfram heimil
• Nándarregla verður áfram 2 metrar og reglur um grímuskyldu eru óbreyttar
• Sem fyrr verða börn fædd 2005 og síðar undanþegin grímuskyldu en falla undir fjölda- og nálægðartakmarkanir
• Börn í leikskólum eru áfram undanþegin 2 metra reglunni og fjöldatakmörkun

Blikur á lofti

Katrín Jakobsdóttir forsætisráðherra sagði nú vera blikur á lofti í þróun faraldursins eftir gott gengi síðustu mánuði. Bregðast þurfi hratt við og vel hafi verið fylgst með nýjum afbrigðum á borð við það breska sem hafi nú náð hér fótfestu. 

Hún sagði vera niðurstöðu ríkisstjórnarinnar og sóttvarnalæknis að mikilvægt væri að grípa fast í taumana í von um að aðgerðirnar þurfi þá að vara í skemmri tíma. 

Svandís sagði að allar hópsýkingarnar sem hafi komið upp síðustu vikur hafi verið tengst breska afbrigðinu sem sé mjög smitandi og valdi frekar alvarlegum veikindum.

Loka skólum til að vernda samfélagið

Lilja Alfreðsdóttir, mennta- og menningarmálaráðherra sagði að stjórnvöld telji öruggast að loka öllum skólum nema leikskólum og með þessu sé verið að vernda samfélagið.

Bjarni Benediktsson sagði betra að stíga snemma inn og afstýra frekari útbreiðslu veirunnar en að sitja uppi með verri afleiðingar með því að bíða og sjá. Stjórnvöld vilji verja bæði líf og heilsu fólks um leið og reynt sé að lágmarka efnahagslegan skaða.

Ýmisir rekstraraðilar eigi eftir að finna fyrir þessum aðgerðum og minnti Bjarni á að fyrirtækjum standi áfram til boða að sækja um lokunarstyrki og önnur úrræði á borð við viðspyrnustyrki. Hann sagði nú unnið að því að tryggja að úrræðin standi til boða út árið.

Fram kemur í tilkynningu frá heilbrigðisráðuneytinu að Þórólfur Guðnason sóttvarnalæknir leggi áherslu á að hertar aðgerðir taki nú til barna allt frá grunnskólaaldri þar sem sýnt þyki að breska afbrigðið valdi meiri einkennum hjá eldri börnum en önnur afbrigði veirunnar. 

Smitum fjölgað hratt

Sautján greindust með kórónuveiruna innanlands í gær. Fjórtán þeirra sem greindust voru í sóttkví, en þrír utan sóttkvíar. Ekki hafa svo margir greinst innanlands á einum degi frá 30. nóvember.

Ellefu nemendur Laugarnesskóla greindust með kórónuveiruna í gær og voru öll börn í Laugarnesskóla og Laugalækjarskóla send í úrvinnslusóttkví. Starfsmaður við skólann greindist með veiruna um helgina.

Einnig var tilkynnt í gærkvöldi að allur árgangur 6. bekkjar í Laugarnesskóla, sem og 5. flokkur karla í knattspyrnu hjá Þrótti, hafi verið sendur í sóttkví. 

Í kjölfarið var þeim boðum komið í morgun til foreldra barna í leikskólanum Laugasól, sem einnig er í Laugarneshverfi, að halda börnunum heima í dag, eigi þau systkini í Laugarnesskóla eða Laugalækjarskóla. 

Fréttin er í vinnslu.