Banda­ríkin nú form­legir aðilar að Parísar­sam­komu­laginu á ný

Joe Biden Bandaríkjaforseti segir að með þessu muni færast aukin orka í baráttuna og að Bandaríkin ætli sér að draga verulega úr losun á næstu þremur áratugum.

Donald Trump, fyrrverandi Bandaríkjaforseti, tilkynnti árið 2017 að Bandaríkin myndu segja sig frá samkomulaginu, þar sem það væri ósanngjart og of dýrkeypt Bandaríkjunum.

Af þeim nærri tvö hundruð ríkjum heims sem staðfestu Parísarsamkomulagið er Bandaríkin eina ríkið sem hefur sagt sig frá því.

Biden tilkynnti þegar á fyrsta degi sínum í embætti að Bandaríkin myndu aftur gerast aðilar að samkomulaginu. 

Forsetinn hafði áður sagst munu leggja mikla áherslu á loftslagsmál í valdatíð sinni, en fyrrverandi utanríkisráðherrann, John Kerry, hefur verið skipaður sérlegur erindreki Bandaríkjastjórnar í loftslagsmálum.