Er þetta skrítnasta tilhlaup sem sést hefur?

Rony tók fyrstu spyrnu Palmeiras og þurfti að skora til að jafna fyrir brasilíska liðið. Það mistókst hrapallega.

Rony tók sér góðan tíma áður en hann hóf tilhlaupið að boltanum. Það virtist svo taka heila eilífð enda stoppaði hann, tók lítil hænuskref og hoppaði loks áður en hann sparkaði í boltann. Spyrnan var kraftlaus og Mohamed El Shenamy, markvörður Al Alhy, átti ekki í miklum vandræðum með að verja hana. Spyrnuna má sjá hér fyrir neðan.

Spyrna Ronys, eða aðhlaupið öllu heldur, minnti um margt á svipuð tilþrif Simones Zaza í vítakeppni í leik Ítalíu og Þýskalands í átta liða úrslitum á EM 2016.

Rony var reyndar ekki eini leikmaðurinn sem fór illa að ráði sínu í vítakeppninni því alls fóru fimm víti í súginn, þrjú hjá Palmeiras og tvö hjá Al Alhy sem fagnaði sigri, 3-2, og bronsverðlaunum á HM félagsliða.

Bayern München varð heimsmeistari félagsliða eftir 1-0 sigur á Tigres í gær. Benjamin Pavard skoraði eina mark leiksins. Bayern er því handhafi allra sex titlanna sem þeir geta unnið.

HM féalgsliða fór að þessu sinni fram í Doha í Katar. Keppni hófst á fimmtudaginn í síðustu viku og lauk í gær.