Innlent

Segir Grænland vera að hrökkva í gírinn sem tilvonandi sjálfstætt ríki

Kristján Már Unnarsson skrifar
Össur sprittar Guðlaug Þór eftir að hafa afhent honum Grænlandsskýrsluna með þéttingsföstu handtaki. 
Össur sprittar Guðlaug Þór eftir að hafa afhent honum Grænlandsskýrsluna með þéttingsföstu handtaki.  Arnar Halldórsson

Stefnt er að því að stórefla samstarf Íslendinga og Grænlendinga og var fyrsta skrefið kynnt í dag þegar Össur Skarphéðinsson, formaður Grænlandsnefndar utanríkisráðherra, afhenti Guðlaugi Þór Þórðarsyni yfirgripsmikla skýrslu um hvernig best væri að fara að.

Í skýrslunni eru 99 tillögur um hvernig megi efla tengslin milli Íslands og Grænlands en fjallað er um málið í frétt Stöðvar 2. Ráðherrann segist hafa fengið Össur til verksins vegna bæði þekkingar hans og ástríðu á málefnum Grænlendinga. Með honum í nefndinni voru Unnur Brá Konráðsdóttir og Óttar Guðlaugsson.

Frá Nýlenduhöfn í Nuuk, höfuðstað Grænlands. Á hæðinni fyrir ofan húsið stendur styttan af Hans Egede, trúboðanum sem með leyfi Danakonungs fór að leita að norrænum íbúum Grænlands fyrir nærri þrjúhundruð árum en fann þá bara inúíta.Árni Harðarson

Eftir vinnslu skýrslunnar segir Össur eitt standa upp úr.

„Það er sóknarhugur í Grænlandi og mér finnast Grænlendingar sem þjóð og tilvonandi sjálfstætt ríki vera að hrökkva í gírinn.“

Og nefnir sem dæmi þann kraft sem er í uppbyggingu sjávarútvegs, flugvallagerð og námavinnslu.

En Grænland er einnig í sviðsljósinu vegna stóraukins áhuga stórveldanna á landinu sem og Norðurslóðum.

„Aukið samstarf Íslands og Grænlands mun færa báðum löndunum ávinning, bæði pólitískan en líka efnahagslegan,“ segir Össur.

Fyrrverandi og núverandi utanríkisráðherra takast í hendur. „Ég myndi kyssa hann ef ekki væri covid,“ sagði Össur.Arnar Halldórsson

Ráðherrann er strax byrjaður að undirbúa rammasamning milli landanna og þingsályktunartillögu.

„Það hefur alltaf verið þörf fyrir það að við vinnum náið saman, þessi lönd. En aldrei meira heldur en núna,“ segir Guðlaugur Þór.

„Grænland hefur verið hið gleymda land á okkar svæði en er hins vegar að koma alveg óðfluga fram á sviðsljósið vegna þess að það hefur algera sérstöðu í mörgum efnum,“ segir Össur.

„Þetta eru okkar næstu nágrannar og möguleikarnir á samstarfi okkar á milli eru gríðarlega miklir. Það mun styrkja báða,“ segir Guðlaugur Þór Þórðarson utanríkisráðherra.

Hér má sjá frétt Stöðvar 2:

Grænland Norðurslóðir Utanríkismál Varnarmál NATO

Tengdar fréttir

Endurtaka útboð í gerð flugvallar á Grænlandi

Flugvallafélag grænlenskra stjórnvalda, Kalaallit Airports, hefur ákveðið að bjóða út að nýju gerð flugvallar við Qaqortoq, stærsta bæ Suður-Grænlands. Þetta er endurtekning á útboði í fyrra en tilboðin sem þá bárust voru sögð hafa verið öll hátt yfir fjárhagsramma verkefnisins. Íslenski verktakinn Ístak var í hópi bjóðenda, sem valdir höfðu verið að undangengnu forvali.

Grænlendingar semja um hærri greiðslur fyrir kvóta

Grænlendingar hafa endurnýjað samninga við Evrópusambandið sem tryggja þeim andvirði þriggja milljarða íslenskra króna í árlegar tekjur af fiskveiðiheimildum í lögsögu Grænlands. Fyrirtæki í eigu Íslendinga er meðal þeirra sem nýta kvótana.

Grænlendingar sömdu um Thule-herstöðina án undirskriftar Dana

Samningar sem landsstjórn Grænlands gerði við Bandaríkjastjórn í vikunni um Thule-herstöðina, eitt hernaðarlega mikilvægasta mannvirki norðurslóða, voru án formlegrar aðildar ríkisstjórnar Danmerkur. Þetta er í fyrsta sinn sem slíkt gerist.

Grænlendingar kynna olíuleit norðan Íslands

Grænlensk stjórnvöld hafa kynnt umhverfismat vegna fyrirhugaðrar olíuleitar við Austur-Grænland, beint norður af Íslandi. Matsskýrslan fjallar meðal annars um áhrif olíuleka á lífríki sjávar milli Íslands og Grænlands.

Eldur sagður kveikja gullæði á Grænlandi

Gullæði á Grænlandi. Þannig hljómar fyrirsögn eins grænlensku fjölmiðlanna eftir að fréttir bárust um stóran gullfund fyrirtækis, sem Íslendingurinn Eldur Ólafsson stendur að.

Mest lesið


Fleiri fréttir

Sjá meira


×

Mest lesið