Hefði getað gefið Maradona rautt spjald fyrir úrslitaleikinn á HM á Ítalíu

Úrslitaleikurinn á heimsmeistaramótinu í knattspyrnu á Ítalíu fyrir þrjátíu árum er að mörgum talinn vera lélegasti og grófasti úrslitaleikur sögunnar. Framkoma Maradona og argentínska landsliðið er meðal annars um að kenna.

Framkoma fyrirliða argentínska landsliðsins frá því fyrir úrslitaleikinn var líka til algjörar skammar ef marka má nýtt viðtal við dómara leiksins.

Diego Maradona átti stórkostlegt heimsmeistaramót í Mexíkó fjórum árum fyrr og vann þá titilinn nánast óstuddur. Nú fjórum árum síðar hafðu argentínska landsliðið komist alla leið í úrslitaleikinn nánast á lukkunni einni saman.

Argentína vann heimamenn í ítalska landsliðinu í vítaspyrnukeppni í undanúrslitunum og hafði einnig komist í gegnum átta liða úrslitin þökk sé vítakeppni.

Þjóðverjar höfðu slegið út Evrópumeistara Hollendinga og sterkt enskt lið á leið sinni í úrslitaleikinn.

Mörgum að óvörum þá fékk Mexíkómaðurinn Edgardo Codesal að dæma úrslitaleikinn en hann var fæddur í Úrúgvæ og þá var afi hans Argentínumaður.

Þetta var erfitt kvöld fyrir Edgardo Codesal sem rak tvo Argentínumenn út af með rautt spjald og Þjóðverjar tryggðu sér svo sigurinn með marki úr vafasamri vítaspyrnu fimm mínútum fyrir leikslok.

Edgardo Codesal endaði á að gefa Maradona gula spjaldið eftir að Andreas Brehme hafði skorað úr vítaspyrnunni og Argentínumenn voru orðnir níu á vellinum. Rauða spjaldið hefði getað farið á loft löngu áður.

Codesal hefur nú rifjað upp þessa kvöldstund í Róm og sagt frá samskiptum sínum við einn pirraðann Diego Maradona.

„Ég hefði getað rekið hann af velli áður en leikurinn hófst því hann blótaði stanslaust í þjóðsöngvunum,“ sagði Edgardo Codesal í viðtali við úrúgvæska miðilinn Tirando Paredes.

„Seinna í leiknum þegar ég rak Monzon af velli með rautt spjald þá kom Maradona til mín, kallaði mig þjóf og sagði að ég væri á launum hjá FIFA,“ sagði Edgardo Codesal.

„Ég sá Maradona gera ótrúlega hluti á vellinum en ég sá líka að hnéið hans var stokkbólgið eftir tæklingu,“ sagði Codesal.

„Sem leikmaður þá var hann sá besti en sem persóna þá var hann ógeðfelldur og ein sú versta sem ég hef kynnst í mínu lífi,“ sagði Edgardo Codesal.

Maradona hélt því fram í viðtölum eftir leikinn að Codesal dómari hafi ekki viljað að Argentína myndi vinna leikinn.

„Okkar leikmenn hlupu mikið en svo kom þessi maður og eyðilagði allt fyrir okkur,“ sagði Diego Maradona eftir leikinn. Hann hélt áfram.

„Þessi maður var hræddur um að leikurinn færi í vítakeppni. Hann vildi gleðja ítalska fólkið. Hann rak Monzon af velli fyrir venjulega tæklingu og skáldaði síðan vítaspyrnu á okkur.“