Súrt tap gerði Valdísi Þóru staðráðna í að verða enn betri

Atvinnukylfingurinn Valdís Þóra Jónsdóttir mætti í settið hjá Kjartani Atla Kjartanssyni og Henry Byrgi Gunnarssyni í Sportið í dag, í gær. Þar sagði hún meðal annars frá því að hún hafi valið golf fram yfir fótbolta og hvernig það kom til.

Kjartan Atli bað Valdísi að ræða hvernig það væri að vera í háskóla í Bandaríkjunum og hvað væri gott við að fara í gegnum nám þar í landi. Valdís kom þá inn á að hún hefði einnig æft fótbolta.

„Ég var í fótbolta líka og ástæðan fyrir að ég byrjaði virkilega að æfa mig í golfi var að ég tapaði Íslandsmeistaratitli, þrettán ára, í bráðabana. Þetta var fyrsta Íslandsmótið mitt, aldrei farið áður. Ég var svo staðráðin í því að ég ætlaði aldrei að tapa aftur fyrir þessari stelpu að restina af sumrinu var ég bara upp á golfvelli.“

„Og ég tapaði ekki fyrir henni aftur,“ sagði Valdís Þóra og hló.

„Ég byrjaði að æfa mig meira á þessum tíma og var rosa mikið upp á golfvelli á sumrin. Var að vinna í unglingavinnunni, fór heim að skipta um föt og upp á golfvöll, fór heim að skipta um föt á fótboltaæfingu og fór svo aftur upp á golfvöll. Var þar langt fram á kvöld og svo mætt í vinnu klukkan sjö á morgnana.“

„Ég er búin að æfa eins og brjálæðingur, sérstaklega þegar ég var yngri. Núna er ég búin að finna gullna meðalveginn fyrir mig. Hversu mikið vil ég æfa, þetta er náttúrulega vinnan mín. Maður þarf að passa sig að æfa nægilega mikið til að bæta sig en passa sig að æfa ekki of mikið að maður verði þreyttur þegar kemur í mót,“ segir Valdís að lokum.

Hér að neðan má sjá klippu úr þættinum þegar Valdís Þóra fer yfir hvernig golfið hafði betur gegn fótboltanum og þetta tap sem virðist hafa gert hana staðráðna í að verða betri í golfi. Í þættinum ræddi Valdís Þóra einnig samfélagsmiðilinn Twitter þar sem hún segir venjulega nákvæmlega það sem henni finnst. 

Þá ræddi hún einnig þegar maður bað um hönd hennar í hjónaband, ætlaði hann að gefa henni tvö kameldýr fyrir ómakið.