Mourinho vill að Southgate nafngreini þjálfarana sem beiti landsliðsþjálfara þrýsting

Jose Mourinho, stjóri Tottenham, sendi Gareth Soutgate, landsliðsþjálfara Englands, pillu á blaðamannafundi fyrir leik Tottenham og Man City sem fram fer í dag.

Þessi stórleikur kemur í kjölfarið af þriggja leikja landsleikjahléi og hefur umræða skapast í kringum það hvernig leikjaálagi enskra landsliðsmanna var stýrt. 

Ein skærasta stjarna Englendinga, Raheem Sterling, gaf til að mynda ekki kost á sér í verkefnið vegna meiðsla en Mourinho er sannfærður um að Sterling verði full frískur þegar flautað verði til leiks seinni partinn í dag.

„Ég myndi vilja að hann nefndi þessa þjálfara á nafn. Hvaða þjálfarar eru það sem eru að pressa á leikmenn sína að mæta ekki í landsleiki?“

„Ég les að Gareth Southgate hafi sagt að honum líði eins og hann þurfi að hringja í þjálfara félagsliðanna til að róa þá niður og hafa stjórn á þessum erfiðu aðstæðum sínum.“

„Mér finnst að hann eigi að segja hvaða þjálfarar þetta eru sem hann hringir í og talar við,“ segir Mourinho sem telur að Southgate ætti alltaf að velja sitt sterkasta lið.

„Þar fyrir utan hefur hann rétt til þess að velja þá leikmenn sem hann vill hafa. Hann vill vinna leiki og ég skil það.“

„Síðast þegar Eric Dier kom úr landsliðsverkefni spilaði hann ekki næstu tvo leiki með Tottenham því hann þurfti tíma til að jafna sig. Ég veit að Raheem mun spila á morgun (í dag),“ segir Mourinho.

„Gareth ætti að útskýra þetta fyrir okkur. Burtséð frá þessu öllu styð ég hann í því að það á að bera virðingu fyrir landsliðinu og hann á að fá að spila þeim leikmönnum sem hann vill spila,“ segir Mourinho.