Sagður hafa gengið í skrokk á konu eftir endurtekin vændiskaup

Karlmaður á höfuðborgarsvæðinu hefur verið ákærður fyrir tilraun til nauðgunar og sérstaklega hættulega líkamsárás gagnvart konu í júní 2019. Karlmaðurinn hafði í tvígang sömu nótt greitt konunni fyrir vændi. Málið er til meðferðar hjá Héraðsdómi Reykjavíkur.

Þinghald í málinu er lokað en karlmaðurinn er sakaður um að hafa aðfaranótt sunnudagsins 30. júní á dvalarstað konunnar framið kynferðisbrot með því að hafa greitt henni 40 þúsund krónur fyrir vændi. Þá hafi hann framið annað kynferðisbrot þegar hann kom aftur til konunnar sömu nótt og greiddi henni þá 20 þúsund krónur, fyrir vændi.

Í þriðja ákæruliðnum er hann svo sakaður um ofbeldi gegn konunni. Annars vegar tilraun til nauðgunar og hins vegar sérstaklega hættulega líkamsárás. Þannig segir í ákæru að karlmaðurinn hafi, í framhaldi af keyptri vændisþjónustu, gert tilraun til að hafa samræði eða önnur kynferðismök við konuna án hennar samþykkis með því að beita hana ofbeldi og hótunum.

Karlmaðurinn er sagður hafa veist að konunni og tekið um háls hennar og munn. Þrengdi hann þannig að konunni að hún missti meðvitund og á sama tíma hótaði hann að drepa konuna, samkvæmt því sem segir í ákæru.

Af þessu hlaut konan eymsli á hálsi og hálshrygg, eymsli yfir neðri og hliðlægu hálsvöðvum, eymsli yfir viðbeini og yfir kjálka, bólgu á vanga, rispur ofan við herðablað og framhandlegg, mar og rispur á háls og kjálka, eymsli yfir öxl, vöðvabólgu og verki ofan við hægra herðablað, fjórar depilblæðingar á neðri vör, eymsli á hægri upphandlegg, mar á hægra olnbogasvæði og eymsli ofan við mjóbak.

Réttargæslumaður konunnar krefst 2,5 milljóna króna í miskabætur fyrir hennar hönd.