Tröllaukinn ísjaki stefnir á breska eyju

Risavaxinn ísjaki sem brotnaði úr Larsen C-ísbreiðunni á Suðurskautslandinu stefnir nú á Suður-Georgíu, breska eyju í Suður-Atlantshafinu. Jakinn er svipaður að stærð og eyjan og gæti valdið meiriháttar búsifjum fyrir dýrategundir sem þar þrífast.

Gervihnettir hafa fylgst með reki gríðarlega stórs borgarísjaka sem brotnaði af Larsen C-ísbreiðunni 12. júlí árið 2017. Jakinn hlaut raðheitið A-68 og áætlað var að hann væri um 5.800 ferkílómetrar að flatarmáli. Til samanburðar mældist Vatnajökull um 7.700 ferkílómetrar að flatarmáli árið 2017.

Fyrstu tvö árin var jakinn nálægt ísbreiðunni en nú rekur stærstan hluta hans hratt norðaustur í átt að Suður-Georgíu, að því er kemur fram á vef evrópsku geimstofnunarinnar (ESA). Brotið fékk heitið A-68A og er nú aðeins um 350 kílómetra frá eyjunni. Talið er að það gæti strandað á grunnsævi og valdið verulegum usla fyrir dýr á eyjunni og á hafsbotni.

„Mörgæsir og selir þurfa að komast út á haf til þess að nærast þannig að ísjakinn gæt hæglega stöðvað fæðisleit þeirra og lífverur á hafsbotni gætu kramist ef jakinn strandar,“ segir ESA.

Strandi ísjakinn við Suður-Georgíu gæti hann verið þar næstu tíu árin. Ísjaki sem rak að ströndum eyjarinnar árið 2004 olli dauða ungviðis bæði mörgæsa og sela.

Enn er þó ekki útilokað að hafstraumar beri ísjakann fram hjá Suður-Georgíu til norðvesturs og hann brotni smám saman upp í minni borgarísjaka.