Herdís Magna er nýr formaður kúabænda

Herdís Magna Gunnarsdóttir, kúabóndi á Egilsstaðabúinu á Egilsstöðum er nýr formaður Landssambands kúabænda og fyrsta konan til að gegna því embætti. Hún segir stöðu nautakjötsframleiðslu og loftlagsmál brýnustu mál greinarinnar í dag.

Herdís Magna var kosinn formaður á aðalfundi Landssambands kúabænda í gær en hún og Þröstur Aðalbjarnarson voru í framboði. Herdís og fjölskylda hennar eru með 70 mjólkandi kýr á Egilsstaðabúinu, auk þess að vera með nautauppeldi.

 En hvað brennur mest á kúabændum í dag?

„Það sem er mest aðkallandi í dag er staða nautakjötsframleiðslunnar, hún er bara graf alvarlega eftir síðustu lækkanir til framleiðenda og við verðum auðvitað að taka á því. Það er einnig sterkur vilji á meðal nautgripabænda að taka loftlagsmál greinarinnar sterkum tökum og ég hlakka sérstaklega til að fylgja þeim málum eftir,“ segir Herdís.

Herdís segir að það þurfi líka að búa greininni sanngjarnt starfsumhverfi en þar vísar hún í tollamálin með landbúnaðarvörur, sem barist verður fyrir að verði löguð sem fyrst.

En hvernig sér hún framtíð kúabúskapur á Íslandi fyrir sér næstu fimmtán til tuttugu árin?

„ Ég held að við eigum bjarta framtíð, við erum heppin því það eru ótrúlega margir styrkleikar, sem við búum að, sem við tökum kannski sem gefnum á Íslandi.“

Næg verkefni bíða Herdísar og nýrrar stjórnar Landssambands kúabænda.

„Hagsmunir bænda að sjálfsögðu, þeir liggja á mörgum stöðum og akkúrat núna höfum við verið að vinna í þessum tollamálum og sanngjörnu starfsumhverfi fyrir bændur,“ segir nýkjörin formaður Landssambands kúabænda.