2 dagar í Meistaradeildina: Gamlir og misvinsælir United-menn mæta aftur á Old Trafford

Meistaradeild Evrópu í fótbolta fer aftur af stað á þriðjudaginn þegar riðlakeppnin hefst með átta leikjum í riðlum E til H. Vísir ætlar að telja niður í Meistaradeildina og í dag skoðum við tvo leikmenn Paris Saint-Germain sem mæta sínu gamla félagi, Manchester United, í riðlakeppninni. Þeir munu væntanlega fá misjafnar móttökur á Old Trafford enda hafa stuðningsmenn United mjög svo ólíkar skoðanir á þeim.

Fyrsti leikur United í H-riðli er gegn silfurliði Meistaradeildarinnar á síðasta tímabili, Paris Saint-Germain. Þetta er í annað sinn á síðustu þremur tímabilum sem United og PSG mætast í Meistaradeildinni. Þau áttust við í 16-liða úrslitum keppninnar 2018-19 þar sem United sló PSG út á eftirminnilegan hátt.

Ein af stórstjörnunum í liði PSG, Ángel Di María, lék með United tímabilið 2014-15. Miklar væntingar voru bundnar við hann enda hafði hann átt stóran þátt í því að Real Madrid varð Evrópumeistari vorið 2014 og komst svo alla leið í úrslit heimsmeistaramótsins með Argentínu þá um sumarið.

United gerði Di María að dýrasta leikmanni í sögu félagsins með því að borga tæpar 60 milljónir punda fyrir hann. Og ef það var ekki nógu mikil pressa fékk hann hina goðsagnakenndu treyju númer sjö sem leikmenn á borð við Cristiano Ronaldo, David Beckham, George Best og Eric Cantona hafa klæðst.

Di María fór vel af stað með United en dalaði svo og átti ekki fast sæti í byrjunarliðinu seinni hluta tímabils. Brotist var inn á heimili hans um veturinn og talið að það hafi átt sinn þátt í misjafnri spilamennsku Argentínumannsins.

Di María var svo seldur til PSG sumarið 2015. Hann mætti aftur á Old Trafford fjórum árum seinna og lagði upp annað mark PSG í 0-2 sigri á United í fyrri leik liðanna í 16-liða úrslitum Meistaradeildarinnar. Di María fékk óblíðar móttökur frá Ashley Young, fyrirliða United, sem tæklaði hann harkalega.

Sá argentínski kláraði samt leikinn, lagði upp mark fyrir Kylian Mbappé og reitti svo stuðningsmenn United til reiði þegar hann þóttist taka sopa af bjórflösku sem var kastað inn á völlinn. Stælarnir í Di María gerðu sigurinn í París enn sætari fyrir leikmenn og stuðningsmenn United.

Ander Herrera kom til United á sama tíma og Di María og átti öllu betri tíma á Old Trafford en sá argentínski. Herrera lék með United í fimm tímabil en það besta var eflaust fyrsta tímabil José Mourinho, 2016-17.

Herrera vann þá deildabikarinn og Evrópudeildina með United. Hann lagði upp sigurmark United fyrir Zlatan Ibrahimovic í úrslitaleik deildabikarsins, þar sem liðið vann 3-2 sigur á Southampton, og var svo valinn maður leiksins í úrslitum Evrópudeildarinnar þar sem United vann Ajax, 2-0. Herrera var svo valinn leikmaður ársins hjá United þetta tímabil.

Herrera lék alls 189 leiki fyrir United og skoraði 20 mörk. Hann var nokkuð vinsæll hjá stuðningsmönnum United fyrir baráttugleði og ófyrirleitna nálgun þótt það hafi ekki allir verið sáttir með hvernig hann yfirgaf félagið. Herrera kom á frjálsri sölu til PSG síðasta sumar. Á síðasta tímabili varð hann franskur meistari með PSG og komst í úrslit Meistaradeildarinnar með liðinu.

Herrera gaf United óhefðbundna stoðsendingu á dögunum þegar hann sannfærði Edinson Cavani um að ganga í raðir félagsins eftir að samningur hans við PSG var ekki framlengdur.

Herrera verður fjarri góðu gamni þegar PSG tekur á móti United á þriðjudaginn en verður væntanlega með í seinni leiknum á Old Trafford sem verður 2. desember.

Meistaradeildin verður áfram í beinni á Stöð 2 Sport og þar verða líka Meistaradeildarmessan og Meistaradeildarmörkin á hverju kvöldi sem leikir fara fram í riðlakeppninni. Fyrstu leikirnir í beinni verða Dynamo Kiev-Juventus (Þriðjudagurinn 20. október klukkan 16.45) og PSG-Manchester United (Þriðjudagurinn 20. október klukkan 18.50).