Snjalltæki sem léttir þér lífið

„Thermomix er þýsk gæðahönnun sem kom fyrst fram á sjónarsviðið 1971 og þá til að saxa, hita og mauka barnamat, allt í einu og sama tækinu. Í dag er Thermomix komin á stafrænt form og sameinar tuttugu hefðbundin heimilistæki í einu tæki. Í rauninni er Thermomix eina heimilistækið sem þarf að eiga í eldhúsinu, fyrir utan kannski bakaraofn og pönnu,“ segir Berglind Ósk Haraldsdóttir, önnur eiganda Eldhústöfra ehf. sem flytja inn þessa snilldargræju sem er nú loks fáanleg á Íslandi.

Thermomix er blandari, matvinnsluvél, vigt, hrærivél, pottur, töfrasproti, þeytari, hnoðari, gufusuðutæki, eggjasuðutæki, sósu- og súpupottur, sous-vide græja og hægeldunarpottur svo fátt eitt sé nefnt!

„Fólk áttar sig ekki á hvað þetta tæki getur gert nema sjá það,“ segir Berglind. „Við kynnum tækið í heimakynningum og eldum þá kvöldmatinn með fólki en erum einnig með sýningareldhús í Síðumúla 29. Þar er hægt að skoða tækið og fá örkynningu hjá okkur mánudaga, miðvikudaga og fimmtudaga milli klukkan 11 og 17 eða á öðrum tímum eftir samkomulagi. Þetta er bara snjalltæki eins og síminn og mjög aðgengilegt og einfalt í notkun,“ segir hún.

„Borðplássið sem tækið tekur nemur stærð A4 blaðs og einn og sami hnífurinn vinnur alla vinnuna. Þá er tækið einnig auðvelt í þrifum og m.a. mega blöndunarskálin og hnífurinn fara í uppþvottavél. Það er ótrúlega gaman að nota Thermomix og fólk verður alveg húkkt á þessu, bæði þeir sem kunna mikið fyrir sér í eldhúsinu og þeir sem eru ekki mikið fyrir að elda.

 „Í gegnum skjáinn er aðgangur að yfir 60.000 uppskriftum og það er hægt að fá ýtarlegar leiðbeiningar við eldamennskuna og mann langar alltaf til að prófa eitthvað nýtt,“ segir Berglind og bendir á að íslenska kokkalandsliðið notaði Thermomix í síðustu keppnisferð sinni á Ólympíuleikum matreiðslumanna þar sem liðið náði sínum besta árangri til þessa, 3. sæti. „Möguleikar vélarinnar eru nánast óþrjótandi og við viljum að fólk læri að nýta þá til fulls og bjóðum þess vegna upp á persónulega þjónustu og námskeið,“ segir Berglind.

Það er sem dæmi sérlega gaman að hræra deig í vélinni og nefnir Berglind sérstaklega súkkulaðikökudeig því vélin bræðir saman súkkulaði og smjör við rétt hitastig. Það er líka gaman að vinna brauðdeig því vélin virkjar gerið við rétt hitastig og ekkert klikkar. „Svo er þetta auðvitað geggjaður blandari og hægt að gera frábæran ís og þeytinga. Þá er gufueldun vanmetin eldunaraðferð en með henni haldast öll næringarefni í matnum og það er ekkert mál að gufuelda með Thermomix. Það er einnig hægt að gerja í vélinni og til dæmis búa til eigin jógúrt og ekki má gleyma að nefna grjónagrautinn sem eldar sig sjálfur,“ segir Berglind og ljóst að möguleikarnir eru nánast óþrjótandi.