Fékk nóg og hjólaði í fyrrverandi stuðningsmann

Toni Leistner, leikmaður þýska knattspyrnufélagsins Hamburg, missti stjórn á skapi sínu þar sem hann beið eftir því að fara í viðtal eftir leik í gær, óð upp í stúku og tók í áhorfanda sem hafði angrað hann.

Hamburg, sem er í 2. deild, tapaði 4-1 í bikarleik gegn Dynamo Dresden, liði sem er deild neðar í Þýskalandi, fyrir framan rúmlega 10.000 áhorfendur. Það er mesti fjöldi sem mætt hefur á fótboltaleik í Þýskalandi frá því að kórónuveirufaraldurinn skall á með tilheyrandi samkomutakmörkunum í mars.

Leistner var greinilega heitt í hamsi eftir tapið og hann lét skapið hlaupa með sig í gönur, eftir að hafa þurft að þola það sem hann kallaði „gríðarlega móðgun“ í garð fjölskyldu sinnar frá áhorfanda. Leistner er fæddur í Dresden og lék fyrir liðið framan af ferli sínum.

Leistner sagði svo frá því á Instagram að hann hefði þurft að hlusta á ljót orð falla í garð maka síns og dóttur. Hann baðst þó afsökunar á viðbrögðum sínum og lofaði að bregðast ekki aftur svona við, sama hvers konar dónaskap yrði beint að honum.

Á Twitter-reikningi Dresden sagði svo: „Toni Leistner er Dresden strákur með hjartað á réttum stað.“