Gagn­rýnir myndbirtingu af fá­klæddum Foden og segir karla eiga skilið sömu virðingu og konur

Hödd Vilhjálmsdóttir almannatengill telur að viðbrögð fjölmiðla og almennings hefðu verið önnur ef kynjunum í máli ensku landsliðsmannanna og kvennanna tveggja sem hittu þá á Hóteli Sögu hefði verið snúið við. Þetta kemur fram í pistli sem hún birti á Facebook-síðu sinni.

„Ég tek það strax fram að ég er ekki að dæma fjórmenningana þar sem að mér ferst það ekki og hef gert fleiri mistök í lífinu en ég nenni að telja. Það eru samt nokkrir hlutir sem mig langar til að benda á tengt þessu máli. Hér eru fjórir ungir einstaklingar að gamna sér. Tveir eru jú efnaðir, karlkyns og með sterkt bakland í gegnum atvinnu sína. Það breytir því þó ekki að þroski þeirra er líklega ekkert meiri en fólks á þessum aldri og þar með að öllum líkindum alveg jafn viðkvæmir og jafnaldrar þeirra - bæði kvenkyns og karlkyns,“ skrifar Hödd.

Eðlilegt að verja þær

Þá segir hún eðlilegt að fólk hafi tekið til varna fyrir konurnar, þær Nadíu Sif Líndal og Láru Clausen, en fúkyrðum hefur verið ausið yfir þær í kjölfar málsins og þær meðal annars kallaðar hjónadjöflar og druslur. Margir hafa þá bent á að það voru ekki þær sem brutu reglur um sóttkví, heldur landsliðsmennirnir Phil Foden og Mason Greenwood, sem voru staddir hér á landi vegna leiks Íslands og Englands síðastliðinn laugardag. Þeir voru í sóttkví, en með því að hitta Láru og Nadíu þverbrutu þeir reglur um slíkt og voru sektaðir um 250.000 krónur hvor áður en þeir fóru úr landi.

„Það er þó þannig að stúlkan / stúlkurnar myndaði til dæmis beran afturenda eins drengjanna og setti inn á samfélagsmiðla fyrir einhverja vini sína til að sjá. Myndinni var, eins og flestir vita, komið á fjölmiðla og fór þaðan í dreifingu. Í ofanálag er stúlkan í viðtali í breskum fjölmiðli þar sem hún greinir frá því að þau höfðu samfarir og að viðkomandi drengur kyssi mjög vel,“ segir Hödd og vísar þar til einkaviðtals Daily Mail við Láru.

Í umfjöllum Daily Mail er meðal annars að finna mynd þar sem Foden sést með nærbuxurnar dregnar niður fyrir mitti og sést í berann rassinn á honum. Myndina tók Lára uppi á hótelherbergi og deildi í lokaðan hóp vina sinna á Instagram. Myndin rataði þó út úr hópnum og í klær ensku pressunnar, en þar eru fá leyndarmál og illa geymd.

„Snúum dæminu við: Bretinn / Bretarnir hefðu myndað beran afturenda stúlkunnar, sett á samfélagsmiðla og myndirnar þaðan farið á fjölmiðla og í keyrslu víða um heim. Annar þeirra hefði svo farið í viðtal í fjölmiðli og talað um hæfni hennar í kossadeildinni og upplýst alla heimsbyggðina um að hann hefði haft samfarir við stúlkuna,“ en í einkaviðtalinu lýsir Lára því meðal annars að Foden hafi verið „góður að kyssa.“

„Mig grunar að það þætti ekki jafn léttvægt og það er að mínu mati bara alls ekkert sanngjarnt. Karlmenn, hvað þá ungir, eiga engu minni virðingu skilið en konur,“ skrifar Hödd að lokum.