38 ára Zlatan fékk árs samning og alvöru laun

Zlatan Ibrahimovic hefur skrifað undir eins árs framlengingu á samningi sínum hjá AC Milan.

Þessi 38 ára gamli framherji snéri aftur til AC Milan í janúar eftir að hafa leikið í Bandaríkjunum með LA Galaxy undanfarin ár.

Hann skoraði ellefu mörk eftir komuna til félagsins og hjálpaði liðinu að klífa upp töfluna en AC Milan náði sér vel á strik eftir kórónuveiruna.

Svíinn hefur spilað með flestum af stærstu liðum heimsins en á Ítalíu hefur hann spilað með Juventus og Inter auk AC Milan. Einnig hefur hann leikið m.a. með Barcelona og Man. United.

Zlatan fær einnig fyrir salti í grautinn en hann fær sjö milljónir evra á þessu ári auk bónusa.