Messi ekki skorað eða lagt upp í El Clásico síðan Ronaldo fór frá Spáni

Lionel Messi hefur ekki skorað né lagt upp mark í El Clásico, leikjum Barcelona og Real Madrid, síðan Cristiano Ronaldo fór til Juventus fyrir tæpum tveimur árum.

Messi náði sér ekki á strik þegar Barcelona tapaði fyrir Real Madrid, 2-0, á Santiago Bernabéu í gær. Með sigrinum komst Real Madrid upp fyrir Barcelona á topp spænsku úrvalsdeildarinnar.

Messi hefur nú ekki komið með beinum hætti að marki í fimm leikjum gegn Real Madrid í röð, eða síðan Ronaldo fór til Juventus 2018.

Í síðustu fimm El Clásico þar á undan skoraði Messi fimm mörk og gaf eina stoðsendingu.

Messi has played five 'clasicos' since Cristiano Ronaldo left Real Madrid and has not scored or assisted in any of them.

In the five 'clasicos' prior to Cristiano's departure he had scored 5 goals, given 1 assist and thrown 1 time at the post. pic.twitter.com/XfIoDI3lnB

— MisterChip (English) (@MisterChiping) March 1, 2020

Ronaldo mætti reyndar á sinn gamla heimavöll í gær og sá sína menn vinna Börsunga í fyrsta sinn í átta leikjum. Ronaldo átti frí þar sem leik Juventus og Inter í ítölsku úrvalsdeildinni var frestað vegna kórónuveirunnar.

Enginn hefur skorað fleiri mörk eða gefið fleiri stoðsendingar í El Clásico en Messi. Mörkin eru 26 mörk og stoðsendingarnar 14 talsins.

Real Madrid er með eins stigs forskot á Barcelona á toppi spænsku deildarinnar þegar tólf umferðum er ólokið.