Birta ráðin list­rænn stjórnandi Listar án landa­mæra

Birta Guðjónsdóttir, sýningarstjóri og myndlistarmaður, hefur verið ráðin listrænn stjórnandi Listar án landamæra, að því er fram kemur í tilkynningu.

Birta var m.a. sýningarstjóri íslenska skálans á Feneyjatvíæringnum 2019, sýningu Hrafnhildar Arnardóttur / Shoplifter og einn af fjórum sýningarstjórum Momentum 8 - Norræna tvíæringsins í samtímamyndlist, í Moss, Noregi.

Síðustu ár hefur Birta stýrt yfir 40 sýningum í helstu listrýmum og listasöfnum hérlendis sem og víða erlendis, m.a. í Berlín, Amsterdam, Melbourne, New York, Sankti-Pétursborg og á Norðurlöndunum.

Birta var safnstjóri Nýlistasafnsins árin 2009 til 2011, listrænn stjórnandi sýningarýmisins 101 Projects í Reykjavík og var sýningarstjóri í SAFNi, samtímalistasafni Péturs Arasonar og Rögnu Róbertsdóttur á árunum 2005 til 2008. Á árunum 2002 til 2013 rak hún sýningarýmið Gallerí Dvergur í kjallara heimilis síns í Reykjavík.

Þá hefur Birta einnig sýnt sín eigin verk á fjölda sýninga, bæði samsýningum og einkasýningum. Birta hefur tekið þátt í fjölmörgum norrænum og alþjóðlegum verkefnum er snúa að sýningarstjórn ásamt því að skrifa um íslenska og erlenda myndlist.

Birta hefur starfað sem  stjórnarmeðlimur í Listfræðafélagi Íslands, varastjórnarmeðlimur í Safnaráði, ritstjórnarmeðlimur íslenska listtímaritsins Sjónauka, meðlimur í stjórn Nýlistasafnsins í Reykjavík og stjórnarmeðlimur í Sambandi íslenskra myndlistarmanna; SÍM. Auk þess hefur hún setið í fagnefndum Listaháskóla Íslands, Listasafns Reykjavíkur og Kynningarmiðstöðvar íslenskrar myndlistar. Birta er með BA gráðu í myndlist frá Listaháskóla Íslands, MFA gráðu í myndlist frá frá Piet Zwart Institute í Rotterdam i Hollandi og nam listfræði (Critical and Pedagogical Studies) við Listaakademíuna í Malmö.

List án landamæra er listahátíð sem leggur áherslu á list fatlaðra listamanna. Hátíðin hefur verið haldin síðan 2003 og sýnir hún allar listgreinar.