Svíar verðlaunaðir á heimsþingi um umferðaröryggi

Heimsþing um umferðaröryggi fór fram í Stokkhólmi í síðustu viku. Á þinginu verður lögð áhersla á að bæta umferðaöryggi og innviði um allan heim á næstu árum, eins og fram kemur í frétt á heimasíðu FÍB.

Á þinginu kynntu sænsk yfirvöld reynslu sína af Vision Zero eða núllsýn. Núllsýn er hugtak yfir þá stefnu að ekkert banaslys eða alvarlegt umferðaslys verði innan fárra ára. Hugmyndin snýst um að sætta sig ekki við að slík slys verði. Frá því stefnan var innleidd í Svíþjóð árið 1997 hefur umferðaslysum fækkað um helming samkvæmt heimasíðu FÍB.

Svíar fengu nýsköpunarverðlaun vegna vegaöryggis. Verðlaunin voru veitt vegna þróunar 2+1 vega með víragerði til aðgreiningar á milli akstursstefna. Hönnunin dregur úr hættu á því að tvö farartæki sem koma úr gagnstæðri átt skelli saman. Tomas Eneroth, innanríkisráðherra Svíþjóðar veitti verðlaununum viðtöku.

Hér er myndband sem útskýrir 2+1.

Sigurður Ingi Jóhannsson, samgöngu- og sveitarstjórnarráðherra, sótti heimsþingið. Yfirlýst markmið ráðstefnunnar var að miðla þekkingu og ræða leiðir til að auka umferðaröryggi í heiminum meðal annars með tilliti til heimsmarkmiða Sameinuðu þjóðanna.

Alls sóttu þingið 80 samgönguráðherrar víðs vegar að úr heiminum. Auk þeirra sóttu stjórnendur og fulltrúar alþjóðastofnana og félagasamtaka þingið ásamt fulltrúum atvinnulífsins. Alls tóku um 1700 manns þátt í þinginu frá um 140 löndum.