Maní ekki vísað úr landi í fyrramálið

Lögregla mun ekki vísa Maní Shahidi, sautján ára gömlum trans-pilti, úr landi í fyrramállið eins og stóð til. Maní hefur verið lagður inn á Barna- og unglingageðdeild Landspítalans vegna „alvarlegrar andlegrar vanheilsu“. Læknar þar leggjast gegn því að hann verði fluttur úr landi í slíku ástandi og hefur lögregla staðfest að það verði ekki gert í fyrramálið.

Þetta staðfestir Claudie Ashonie Wilson, lögmaður fjölskyldunnar í samtali við Vísi.

„Hann er kominn inn á BUGL vegna alvarlegra andlegrar vanheilsu og læknir legst gegn því að hann verði færður úr landi í þessu ástandi. Lögreglan hefur nú þegar staðfest við mig að hann verður ekki færður úr landi í fyrramálið. Þeir taka tillit til heilsufarsvanda hans,“ segir Claudie.

Vísa átti Maní og foreldrum hans úr landi í fyrramálið en fjölskyldan kom til Íslands í mars í fyrra. Fjölskyldufaðirinn hafði kennt japanska heilun í Íran sem nefnist Reiki. Írönsk yfirvöld litu á það sem guðlast og að hann ynni gegn ráðandi stjórnvöld. Óttast þau mjög öryggi sitt fari þau aftur til Íran þar sem þeim hefur verið hótað hrottafengnu ofbeldi. Senda átti fjölskylduna til Portúgal í fyrramálið en þaðan komu þau til Íslands

Mótmælendur komu saman við dómsmálaráðuneytið í dag til að krefjast þess að fjölskyldan fengi að vera áfram hér á landi.

Segist hafa tekið eftir ýmsum annmörkum á málsmeðferðinni

Claudie segir það ekki liggja fyrir hve næstu skref í málinu eru fyrir utan það að ljóst sé að fjölskyldunni verði ekki vísað úr landi á morgun. Hún segist hafa tekið eftir ýmsum annmörkum á málsmeðferð málsins hjá yfirvöldum hér á landi sem kanna verði nánar.

„Það er erfitt að spá fyrir um hvað gerist næst en að sjálfsögðu má gera ráð fyrir, lögum samkvæmt og ekki síst Barnasáttmálans, að hann fái réttlátari málsmeðferð og að mál hans verði afgreitt til jafns við önnur börn. Það er ýmislegt sem að ég hef tekið eftir í þessu máli að það er mikill annmarki á málsmeðferðinni sem hann hefur fengið. Meðal annars það að hann fékk aldrei að tjá sig um málið, ekki neitt. Við erum að tala um 17 ára dreng sem fékk ekki og var ekki einu sinni spurður um málið og af hverju hann væri að leita eftir vernd,“ segir Claudie.

„Þetta er alvarlegt brot á réttindum hans, ekki síst Barnasáttmála sem gerir ráð fyrir að börn fái að tjá sig. það er miðað við að börn séu 12 ára eldri. 17 ára drengur sem fékk ekki einu sinni spurninga: „Viltu segja eitthvað um málið þitt?“,“ bætir hún við.

Þá furðar hún sig á því hvernig kærunefnd útlendingamála hafi tekið á málinu. Aðeins hafi verið tekin til afstaða til aðalkröfu foreldranna í málinu, en ekki til varakröfunnar.

„Foreldrar leggur fram beiðni um frestun réttaráhrifa en til vara beiðni um endurupptöku máls. Stjórnvöld afgreiddu hluta af þeirri beiðni en ekki rest,“ segir Claudie. „Ég hef aldrei séð þetta. Þetta er náttúrulega ekki góðir og vandaðir stjórnsýsluhættir að afgreiða mál svona og ekki síst fer það gegn stjórnýsluframkvæmd hvernig á að afgreiða slík mál.“