Tíundi sigur Fram í röð | KA/Þór fór illa með Aftureldingu

Fram vann Hauka að Ásvöllum með sex marka mun í dag, 28-22. Þá vann KA/Þór 18 marka sigur á botnliði Olís deildar kvenna Aftureldingu í dag. Lokatölur á Akureyri 30-12.

Þægilegt hjá Fram á Ásvöllum

Framstúlkur voru með yfirhöndina nær allan leikinn í dag. Þær náðu sex marka forystu í fyrri hálfleik og staðan 16-10 í hálfleik. Gestirnir úr Safamýri náðu mest níu marka forystu í síðari hálfleik en unnu á endanum sex marka sigur.

Lokatölur 28-22 og Fram því komið með fimm stiga forskot á toppi deildarinnar. Ragnheiður Júlíusdóttir skoraði sjö mörk fyrir Fram í leiknum og Þórey Rósa Stefánsdóttir sex. Hjá Haukum var Berta Rut Harðardóttir markahæst með fimm mörk.

Haukar eru í 5. sæti deildarinnar sem stendur.

Afturelding átti aldrei möguleika 

Heimastúlkur voru fljótlega komnar með sex marka forystu. Sú forysta var orðin 12 mörk í hálfleik, staðan þá 18-6. Í þeim síðari var sama upp á teningnum en KA/Þór hafði öll völd á vellinum.

Fór það svo að þær unnu einkar öruggan 18 marka sigur í dag, lokatölur 30-12. Rakel Sara Elvarsdóttir og Ásdís Guðmundsdóttir skoruðu átta mörk hvor fyrir KA/Þór og þá varði Matea Lonac 19 skot í markinu.

Hjá Aftureldingu voru Anamaria Gugic og Katrín Helga Davíðsdóttir með þrjú mörk hvor.

KA/Þór er í 6. sæti deildarinnar með 10 stig en Afturelding situr sem fastast á botninum án stiga.