Segja Árna með 150 milljónir í laun, ekki 200

Vegna „mannlegra mistaka“ og tvítalningar var Árni Oddur Þórðarson, forstjóri Marels, sagður vera með hærri laun í nýbirtum ársreikningi félagsins en hann var með í raun og veru - að sögn Marels. Árslaun hans námu því ekki 200 milljónum króna eins og sagði í ranga ársreikningnum, heldur 150 milljónum.

Vefmiðlar landsins höfðu gert sér mat úr þessum launagreiðslum til Árna á síðasta ári. Laun, kaupaukar og hlunnindi hans námu, fyrir leiðréttinguna nú síðdegis, um 200 milljónum króna árið 2019 sem gera í kringum 17 milljónir á mánuði. Sundurliðun á launum hans mátti finna í skýringu 29 í ársreikningnum, sem sjá má hér að neðan.

Marel sendi hins vegar frá sér leiðréttingu til Kauphallarinnar nú á fjórða tímanum þar sem umrædd skýring er leiðrétt. Það sé ekki rétt að laun og hlunnindi Árna hafi numið 1,06 milljónum evra, 150 milljónum króna í fyrra eins og sagði í skýringunni.

Hið rétta er þessi liður í launum Árna nam aðeins 680 þúsund evra, 93 milljónum króna. Aðrir liðir í launagreiðslum Árna, eins og kaupaukagreiðslur, eru þó óbreyttir. Heildarlaun hans námu því ekki 1,4 milljónum evra eins og fyrri ársreikningur sagði, heldur 1,060 milljónum. Það gera um 150 milljónir íslenskra króna.

Í samtali við Vísi segir Auðbjörg Ólafsdóttir, yfirmaður samskipta og fjárfestatengsla hjá Marel, að um leiðinda mannleg mistök hafi verið að ræða. Liður í launagreiðslum Árna hafa verið tvítalinn og var hann því sagður með hærri laun í gamla ársreikningnum.

Aðspurð um hvernig þetta gat gerst, í ljósi þess að endurskoðendur á vegum KPMG kvittuðu upp á ársreikninginn, segir Auðbjörg ekki hafa nein svör við því. Þetta hafi verið mistök sem nú sé búið að leiðrétta. Hún segist jafnframt gera ráð fyrir að aðrir þættir ársreikningsins séu réttir.