Lítið sem ekkert ferðaveður verður á landinu fram á miðvikudag. Í dag er von á norðaustanstormi þegar líður á daginn og á morgun verður vindurinn með svipuðu móti, að því er fram kemur í hugleiðingum veðurfræðings á vef Veðurstofu Íslands.Gular viðvaranir eru í gildi næstu daga.
Stormsins gætir einkum vestan- og norðanlands í dag en hægari vindur verður norðaustan- og austanlands. Þá helst þurrt en skafrenningur verður suðvestantil, og él og skafrennningur víða annars staðar. Búast má við samfelldri úrkomu austast, slyddu á láglendi en snjókomu til fjalla.
Sjá einnig: Fjögur þúsund manns á Keflavíkurflugvelli
Á morgun, þriðjudag, verður vindur svipaður áfram en úrkoman færist lengra vestur með norðurlandinu.
„Þá ætti að vera orðið nægilega hlýtt til að úrkoma á Austurlandi falli sem rigning, slydda norðaustanlands en snjókoma þar vestur af. Áfram verður úrkomulítið á Suður- og Suðvesturlandi, en skafrenningur. Því má segja að lítið sem ekkert ferðaverður verður á landinu fram á miðvikudag,“ segir í hugleiðingum veðurfræðings.
Þá eru gular viðvaranir í gildi í öllum landshlutum í dag og á morgun. Hríðarviðvörun hefur þegar tekið gildi á Vestfjörðum og síðdegis taka gildi stormviðvaranir vestan- og sunnanlands. Miklar líkur eru á samgöngutruflunum víðast hvar á landinu og vindur verður sums staðar allt að 28 m/s.
Miklar raskanir urðu á flugi í gærkvöldi og í nótt vegna veðurs. Fjöldi flugvéla sat fastur á Keflavíkurflugvelli í gær og það sem af er morgni hefur engin flugvél Icelandair lent á vellinum frá Norður-Ameríku. Brottfarir hafa hins vegar verið samkvæmt áætlun í morgun, samkvæmt upplýsingum á vef Isavia.
Veðurhorfur á landinu næstu daga
Á þriðjudag:
Norðaustan hvassviðri eða stormur og snjókoma um landið N-vert, slydda eða rigning A-lands, en annars þurrt að kalla. Hiti nálægt frostmarki, en 1 til 5 stig við S- og A-ströndina.
Á miðvikudag:
Norðaustan 10-18, hvasssat NV-til. Snjókoma N-lands, slydda A-lands, en annars úrkomulítið. Vægt frost, en víða frostlaust við ströndina.
Á fimmtudag:
Austlæg eða breytileg átt og víða dálítil úrkoma. Hiti um og undir frostmarki.
Á föstudag:
Vestlæg átt og dálítil él S- og V-til, en úrkomulítið annars. Frost um mest allt land.
Á laugardag:
Norðvestlæg átt með éljum, einkum NA-til. Frost 1 til 9 stig, kaldast inn til landsins.
Á sunnudag:
Útlit fyrir ákveðna sunnanátt með mildu og vætusömu veðri.
