Tveir starfs­menn frétta­stofu RÚV í sótt­kví

Tveir starfsmenn fréttastofu RÚV eru komnir í sóttkví eftir að hafa umgengist einstakling sem greindist með kórónuveirusmit. Fréttablaðið greinir frá því að starfsmennirnir sem sendir voru í sóttkví tengist máli þar sem gestkomandi einstaklingar í Vestmannaeyjum greindust með veiruna.

Stefán Eiríksson, útvarpsstjóri, staðfestir þetta í samtali við fréttastofu og segir hann aðra starfsmenn hafa verið upplýsta um málið. Gripið hafi verið til aðgerða um leið og tilkynnt hafi verið um hertar samkomutakmarkanir síðastliðinn föstudag og því hafi allt verið í samræmi við áætlanir RÚV og skipulag.

„Starfsfólkið fór í sóttkví af því að það var í tengslum við smitaða einstaklinga á tilteknum tímapunkti,“ segir Stefán. Búið sé að skipta fréttastofunni upp í sóttvarnarhólf líkt og gert var í fyrri bylgjunni.