Gíslataka í rútu í Úkraínu

Vopnaður maður heldur nú hópi farþega lítillar rútu í gíslingu í borginni Lutsk í vestanverðri Úkraínu. Hann er sagður krefjast þess að hátt settir stjórnmálamenn lýsi því yfir að þeir séu „hryðjuverkamenn“.

Lögreglumenn reyna nú að tala um fyrir manninnum sem yfirvöld segja að heiti Maksym Kryvosh, 44 ára gamall Rússi, sem hefur verið dæmdur fyrir glæpi og er talinn eiga við geðræn vandamál að stríða. Hann hefur setið tíu ár í fangelsi fyrir fjársvik, rán og ólögleg vopn.

Ekkert hefur frést af líðan farþega rútunnar sem hann heldur í gíslingu en umsátrið hefur nú staðið yfir í nokkrar klukkustundir. AP-fréttastofan segir að um tíu manns séu í gíslingu en áður var talað um allt að tuttugu gísla. Gíslatökumaðurinn er sagður hafa hafnað óskum lögreglunnar um að færa gíslunum mat og vatn.

Maðurinn skaut á lögregludróna út um rúðu á rútunni og kastaði handsprengju sem sprakk ekki, að sögn AP. Þá er hann sagður halda því fram að hann hafi komið fyrir sprengju á opinberum stað í borginni sem hann gæti sprengt með fjarstýringu.

Hluti miðborgar Lutsk hefur verið girt af vegna umsátursins og íbúum verið sagt að halda sig heima eða á vinnustöðum sínum.

Fréttin hefur verið uppfærð.