Fyrr­verandi for­sætis­ráð­herra verður næsti fjár­mála­ráð­herra

Matti Vanhanen, fyrrverandi forsætisráðherra Finnlands og núverandi forseti þingsins, verður næsti fjármálaráðherra landsins eftir afsögn Katri Kulmuni fyrir helgi. YLE segir frá þessu. 

Miðstjórn Miðflokksins, þingflokkurinn og Evrópuþingmenn komu saman til fundar í morgun þar sem ákveðið var að tilnefna nýjan fjármálaráðherra.

Kulmuni tilkynnti um afsögn sína síðastliðinn föstudag í kjölfar fjölmiðlaumræðu í tengslum við greiðslu ráðuneytis hennar á háum reikningum til ráðgjafastofu sem veitti ráðherranum þjálfun í framkomu og ræðuflutningi. Reikningar ráðgjafafyrirtækisins Tekirs námu samtals 48 þúsund evrum, sem samsvarar rúmum sjö milljónum króna.

Kulmuni sagðist þó ætla að halda áfram að gegna embætti formanns flokksins og að flokkurinn muni áfram eiga aðild að ríkisstjórninni.

Hin 64 ára Vanhanen gegndi embætti forsætisráðherra Finnlands á árunum 2003 til 2010. Ekki liggur fyrir hver mun taka við af Vanhanen sem næsti forseti þingsins.