Fleiri en fjórar milljónir hafa smitast af veirunni

Fjöldi staðfestra kórónuveirusmita er kominn yfir fjórar milljónir á heimsvísu samkvæmt tölum Johns Hopkins-háskóla í Bandaríkjunum. Þá hafa fleiri en 277.000 manns látið lífið, flestir þeirra í Bandaríkjunum, Bretlandi og Ítalíu.

Séfræðingar óttast engu að síður að raunverulegur fjöldi smitaðra sé mun hærri. Sum lönd hafi tekið fá sýni og það skekki myndina. Samkvæmt opinberum tölum hefur meira en fjórðungur allra smita í heiminum greinst í Bandaríkjunum og þriðjungur dauðsfalla.

Í sumum löndum er byrjað að hægja á dánartíðninni, þar á meðal á Spáni sem hefur orðið illa úti í faraldrinum. Því hafa stjórnvöld víða byrjað að slaka á takmörkunum sem er ætlað að halda faraldrinum í skefjum.

Varað hefur verið við því að verði slakað á aðgerðunum of hratt sé hætta á annarri bylgju smita og dauðsfalla, að sögn breska ríkisútvarpsins BBC.