Byrjað að opna vegi og jólaveðrið lítur vel út

Búið er að opna þjóðveg 1 um Ljósavatnsskarð samkvæmt upplýsingum frá Vegagerðinni. Veginum var lokað í gær vegna snjóflóðahættu. Þá er nú verið að moka allar helstu leiðir og gert er ráð fyrir að víðast hvar verði hægt að opna fyrir umferð upp úr klukkan átta. Þá er tekið að lægja eftir vindasama daga og von á góðu jólaveðri.

Samkvæmt upplýsingum á vef Vegagerðarinnar er enn lokað um Þverárfjall, Siglufjarðarveg og Víkurskarð nú á sjöunda tímanum. Vegfarendum er jafnframt bent á að víðast hvar er vetrarfærð á Norðurlandi. Þá er verið að moka yfir Mýtvatns- og Möðrudalsöræfi en vegurinn um Hólasand er lokaður.

Á Austurlandi er víða vetrarfærð en greiðfært sunnan Reyðarfjarðar. Þá er vegfarendum á Suðausturlandi bent á að klæðning hafi fokið af kafla af veginum við Lómagnúp og þeir beðnir að fara varlega.

Töluvert snjóflóð féll á veginn um Ljósavatnsskarð á fimmtudagskvöld en það var hreinsað upp í fyrradag. Vegurinn var opinn yfir daginn í gær en vegfarendur hafa verið beðnir um að fara varlega vegna snjóflóðahættu. Stórhríð var á svæðinu nú fram undir morgun en Vegagerðin hætti að þjónusta veginn frá og með klukkan tíu í gærkvöldi. Upplýsingar um færð og veður má nálgast á vef Vegagerdarinnar.

Útlitið gott fyrir þá sem óska sér hvítra jóla

Eftir vindasama daga er nú búið að lægja víðast hvar á landinu og í dag verður austan og norðaustan 3-10 m/s, að því er fram kemur í hugleiðingum veðurfræðings. Áfram mun þó blása á Vestfjörðum en þar verða 8-15 m/s fram á kvöld. Þá verður snjókoma eða él viðloðandi við noðurströndina og Vestfirði en annars þurrt og bjart með köflum.

„Jólaveðrið lítur vel út um allt land, en útlit er fyrir hæga breytilega átt og stöku él eða slydduél, einkum á Norðaustur- og Suðvesturlandi og útlitið því gott í flestum landshlutum fyrir þá sem óska sér hvítra jóla. Milli jóla og nýárs er síðan aftur von á umhleypingum en að þessu sinni sunnanátt með hækkandi hita og rigningu,“ segir í hugleiðingum veðurfræðings.