Abdelmadjid Tebboune, forseti Alsír, hefur skipað Abdelaziz Djerad nýjan forsætisráðherra landsins. Djerad hefur áður starfað sem diplómati.
Djerad mun fá það hlutverk að mynda nýja ríkisstjórn í landi þar sem mótmæli hafa verið mikil síðastliðið ár.
Abdelmadjid Tebboune sór embættiseið sem forseti í síðustu viku eftir að hafa borið sigur úr býtum í forsetakosningum sem stór hluti landsmanna ákvað að sniðganga.
Eftir að mótmælin blossuðu upp í byrjun síðasta árs hrökklaðist Abdelaziz Bouteflika úr stóli forseta, en hann hafði þá stýrt landinu í nærri tuttugu ár. Hann hafði þó lítið sem ekkert komið fram opinberlega frá árinu 2013 þegar hann fékk heilablóðfall.
Afsögn Bouteflika batt þó ekki enda á mótmælin sem hafa haldið áfram alla föstudaga þar sem þess er krafist að valdaklíkunni verði komið frá.
Fyrr í þessum mánuði voru tveir fyrrverandi forsætisráðherrar – þeir Ahmed Ouahiya og Abdelmalek Sellal – dæmdir í fangelsi og greiðslu bóta fyrir spillingu.
Skipaður nýr forsætisráðherra
Tengdar fréttir
Starfandi forseti og æðsti herforingi Alsír látinn
Alsírski hershöfðinginn Ahmed Gaid Salah, sem er þekktur fyrir að hafa hvatt fyrrverandi forseta Alsír, Abdelaziz Bouteflika að segja af sér, er látinn 79 ára að aldri.
Sniðganga og mótmæli setja svip á forsetakosningar í Alsír
Forsetakosningar fara fram í Alsír í dag eftir margra mánaða óvissuástand í stjórnmálum landsins.
