Anton Sveinn sló enn eitt Íslandsmetið og var hársbreidd frá bronsinu

Anton Sveinn McKee endaði í 4. sæti í úrslitum í 200 metra bringusundi á EM í 25 metra laug í Glasgow í dag.

Anton synti á 2:02,94 mínútum og bætti Íslandsmetið sem hann setti í morgun. Hann synti þá á 2:03,67 mínútum.

Hann var hársbreidd frá því að vinna til bronsverðlauna. Þjóðverjinn Marco Koch, sem endaði í 3. sæti, synti á 2:02,87 mínútum.

Hollendingurinn Arno Kamminga vann 200 metra bringusundið á 2:02,36 mínútum. Erik Persson frá Svíþjóð varð annar á 2:02,80 mínútum.

Anton hefur sett fimm Íslandsmet og eitt Norðurlandamet á EM.

Í gær sló hann Íslandsmetið í 50 metra bringusundi þrisvar og endaði í 7. sæti í úrslitunum.