Hálkan getur leynst víða

Veðurfræðingur biður ferðalanga að hafa í huga að hálka geti leynst víða á landinu í dag, ýmist vegna þess að bleyta gærdagsins hafi frosið í glæran ís eða vegna snjóþekju. Austlæg átt verður annars ráðandi í dag og sums staðar slydda.

Vindur verður yfirleitt hægur þó hann geti náð um 10 metrum á Vestfjörðum og með suðurströndinni. Á suðaustanverðu landinu verður slydda eða snjókoma viðloðandi í allan dag.

„Á Vesturlandi er farið að létta til og ætti að verða þokkalega bjart þegar kemur fram á daginn. Á norðanverðu landinu hefur verið lítlsháttar snjómugga í nótt, en það ætti að stytta upp á næstu klukkustundum og rofa til síðdegis á þeim slóðum. Það er frost um mestallt land, en hiti gæti náð að skríða yfir frostmarkið á sumum stöðum við sjóinn yfir hádaginn.“

Í gær var varað við því að mikil hálka myndist á vegum og gangstéttum sunnan- og suðvestanlands í nótt og nú í morgun. Þar sé höfuðborgarsvæðið með talið. Kalt var í nótt og frysti á blautum vegum. Hálkuviðvörun er enn í gildi á vef Veðurstofunnar.

Á morgun og fimmtudag er áfram útlit fyrir hæglætisveður víðast hvar á landinu, úrkomulítið og bjart á köflum.  

„Að lokum má nefna að spár gera ráð fyrir að hvessi á sunnanverðu landinu á föstudag með úrkomu (rigning eða slydda á láglendi), en þurrt og skaplegri vindur norðantil,“ segir í hugleiðingum veðurfræðings.

Vetrarfærð er í öllum landshlutum, samkvæmt upplýsingum á vef Vegagerðarinnar. Greiðfært er á höfuðborgarsvæðinu, Kjalarnesi og á Reykjanesbraut.

Yfirlit: Vetrarfærð er í öllum landshlutum, éljagangur er á Norðaustur- og Austurlandi en snjókoma á Suðausturlandi. #færðin

— Vegagerðin | Iceland Roads (@Vegagerdin) November 5, 2019

Veðurhorfur á landinu næstu daga

Á miðvikudag:

Austlæg átt 3-8 m/s, úrkomulaust og bjart á köflum, en 8-13 og él með suðurströndinni. Frost 0 til 10 stig, kaldast í innsveitum norðaustanlands, en frostlaust við suður- og vesturströndina.

Á fimmtudag:

Suðlæg átt 3-8 m/s. Dálítil slydda eða snjókoma um tíma á Vestfjörðum og stöku él sunnanlands, en bjart veður á Norður- og Austurlandi. Hiti breytist lítið.

Á föstudag:

Gengur í allhvassa eða hvassa suðaustanátt á sunnanverðu landinu með rigningu eða slyddu. Hiti 0 til 5 stig. Hægari vindur norðantil, þurrt og vægt frost.

Á laugardag:

Austan 8-13, en 13-18 syðst. Bjartviðri norðan- og vestanlands, en rigning eða slydda suðaustantil. Hiti 0 til 5 stig, en vægt frost í innsveitum fyrir norðan.

Á sunnudag og mánudag:

Fremur hæg breytileg átt og víða léttskýjað. Frost 0 til 8 stig, en frostlaust með suður- og vesturströndinni.