„Þurfum á Birki Má að halda“

Erik Hamrén, þjálfari íslenska karlalandsliðsins í fótbolta, segist hafa valið Birki Má Sævarsson í hópinn fyrir leikina gegn Frakklandi og Andorra í undankeppni EM 2020 því íslenska liðið þurfi á honum að halda.

Birkir Már hefur ekki leikið með íslenska landsliðinu síðan í 4-0 tapinu fyrir heimsmeisturum Frakka á Stade de France í mars.

Valsmaðurinn var ekki valinn í landsliðshópinn fyrir leikina gegn Moldóvu og Andorra í síðasta mánuði.

„Það er ekki skrítið að velja hann núna. Við þurfum á honum að halda. Birkir Már góður leikmaður sem býr yfir mikilli reynslu,“ sagði Hamrén á blaðamannafundinum þegar landsliðshópurinn var kynntur í dag.

Birkir Már er leikjahæstur í íslenska hópnum ásamt Ragnari Sigurðssyni. Þeir hafa báðir leikið 90 landsleiki.