Munu þurfa að losa geisla­virkt vatn frá Fukus­hima út í Kyrra­hafið

Yoshiaki Harada, umhverfisráðherra Japans, segir að umsjónaraðili kjarnorkuversins í Fukushima, sem eyðilagðist í kjölfar jarðskjálfta og flóðbylgju árið 2011, muni innan þriggja ára þurfa að losa geislavirkt vatn út í Kyrrahafið.

Ástæðan er sú að ekki verður nægilegt rými til þess að geyma mengaða vatnið en meira en milljón tonn af vatni eru nú geymd í tönkum við kjarnorkuverið.

Það er Tokyo Electric Power (Tepco) sem sér um kjarnorkuverið í Fukushima. Fyrirtækið hefur átt í vandræðum með grunnvatn á svæðinu sem mengast þegar það kemst í snertingu við vatn sem er notað til þess að koma í veg fyrir að kjarnaofnar versins bráðni.

Mengað vatnið er geymt í um það bil þúsund tönkum en Tepco hefur nú varað við því að sumarið 2022 muni það komi ekki meira vatni fyrir í tönkunum.

„Eini möguleikinn er að veita vatninu út í sjó og þynna það út. Ríkisstjórnin mun koma saman og ræða þetta,“ sagði japanski umhverfisráðherrann við fjölmiðla í dag.

Engin endanleg ákvörðun verður tekin um hvað eigi að gera við vatnið fyrr en stjórnvöld hafa ráðfært sig við hóp sérfræðinga.

Að því er fram kemur á vef Guardian er viðbúið að það muni reita sjómenn við Fukushima til reiði ef ákveðið verður að veita geislavirku vatninu út í sjó, enda hafi þeir unnið baki brotnu að því að endurreisa sjávarútveginn á svæðinu síðan kjarnorkuslysið varð árið 2011.