Ragnar og félagar upp í 2. sætið | Böðvar lék 90 mínútur annan leikinn í röð

Ragnar Sigurðsson var með fyrirliðabandið hjá Rostov sem vann 1-0 sigur á Krylya Sovetov Samara í rússnesku úrvalsdeildinni í kvöld.

Með sigrinum komst Rostov upp í 2. sæti deildarinnar. Eftir fimm umferðir eru Ragnar og félagar með ellefu stig, tveimur stigum minna en topplið Zenit.

Úsbekinn Eldor Shomurodov skoraði eina mark leiksins á 33. mínútu. Rostov hefur skorað flest mörk allra í rússnesku deildinni, eða tíu.

Böðvar Böðvarsson lék allan leikinn þegar Jagiellonia gerði 1-1 jafntefli við Lechia Gdansk í pólsku úrvalsdeildinni í kvöld.

Jagiellonia eru í 7. sæti deildarinnar með fimm stig eftir fjórar umferðir.

Böðvar hefur leikið 90 mínútur í síðustu tveimur deildarleikjum Jagiellonia. Á síðasta tímabili lék hann 16 deildarleiki.