Ólafía Þórunn tekur þátt í Einvíginu á Nesinu

Árlegt góðgerðarmót Nesklúbbsins í golfi, Einvígið á Nesinu, fer fram næstkomandi mánudag og verður það í 23.skipti sem mótið fer fram.

Tíu kylfingum er boðið til leiks og er leikið í þágu Barnaspítala Hringsins.

Keppendalistinn er afar vel skipaður í ár en sex atvinnukylfingar eru á meðal keppenda í mótinu sem verður með breyttu sniði í ár þar sem engin höggleikskeppni verður til að byrja með heldur hefst einvígið strax. Einn kylfingur fellur út á hverri holu þar til tveir standa eftir og berjast um sigur á 9.braut.

Keppendalistinn 2019 er svohljóðandi.

AXEL BÓASSON, GK

Ríkjandi Íslandsmeistari í golfi og atvinnukylfingur sem hefur leikið á næst sterkustu atvinnumótaröð Evrópu, Challenge Tour. Axel hefur þrívegis fagnað Íslandsmeistaratitlinum í golfi.

BIRGIR LEIFUR HAFÞÓRSSON, GKG

Sigursælasti kylfingur Íslands í karlaflokki á Íslandsmótinu í golfi, sjöfaldur Íslandsmeistari. Leikreyndasti atvinnukylfingur Íslands frá upphafi og eini karlkylfingurinn sem hefur tryggt sér keppnisrétt á Evrópumótaröðinni, sterkustu atvinnumótaröð Evrópu.

BJÖRGVIN SIGURBERGSSON, GK

Fjórfaldur Íslandsmeistari í golfi og einn leikreyndasti keppniskylfingur Íslands. Hefur einu sinni sigrað í Einvíginu á Nesinu.

GUÐMUNDUR ÁGÚST KRISTJÁNSSON, GR

Atvinnukylfingur sem nýverið tryggði sér keppnisrétt á næst sterkustu atvinnumótaröð Evrópu, Challange Tour. Hefur sigrað á þremur atvinnumótum á Nordic Tour mótaröðinni á þessu tímabili.

GUÐRÚN BRÁ BJÖRGVINSDÓTTIR, GK

Atvinnukylfingur úr GK og ríkjandi Íslandsmeistari í golfi. Guðrún Brá leikur á næst sterkustu atvinnumótaröð Evrópu í kvennaflokki, LET Access mótaröðinni. Hefur verið í fremstu röð á Íslandi undanfarin ár.

HARALDUR FRANKLÍN MAGNÚS, GR

Atvinnukylfingur úr GR sem leikur á Nordic Tour mótaröðinni. Íslandsmeistari í golfi 2012. Er eini íslenski karlkylfingurinn sem hefur leikið á risamóti í keppni atvinnukylfinga, Opna breska meistaramótinu 2018.

NÖKKVI GUNNARSSON, NK

Klúbbmeistari NK 2019 og þaulreyndur keppniskylfingur. PGA kennari og starfar sem íþróttastjóri NK.

ÓLAFÍA ÞÓRUNN KRISTINSDÓTTIR, GR

Atvinnukylfingur úr GR og Íþróttamaður ársins 2017. Tryggði sér keppnisrétt á LPGA mótaröðinni, sterkustu atvinnumótaröð heims, fyrst allra íslenskra kylfinga. Er með keppnisrétt á Symetra Tour mótaröðinni í Bandaríkjunum og er með takmarkaðan keppnisrétt á LPGA. Þrefaldur Íslandsmeistari í golfi.

ÓLAFUR BJÖRN LOFTSSON, GKG

Atvinnukylfingur sem hóf ferilinn á Nesvellinum sem félagsmaður í NK. Íslandsmeistari í golfi 2009 og eini íslenski karlkylfingurinn sem hefur leikið á PGA mótaröð atvinnumanna í Bandaríkjunum.

RAGNHILDUR SIGURÐARDÓTTIR, GR

Fjórfaldur Íslandsmeistari í golfi í kvennaflokki og ein þaulreyndasti keppniskylfingur Íslands. Ríkjandi meistari í Einvíginu á Nesinu og hefur því titil að verja.