HK-ingur inn að hjartarótum

Valgeir Valgeirsson, leikmaður HK, hefur farið mikinn í liðinu. Hann stefnir hátt en er þó með báða fæturna á jörðinni. Hann er gríðarlega vinsæll meðal iðkenda HK sem hann þjálfar og nýtur þess að þjálfa hjá félaginu sem hann elskar.

Auðvitað þýðir ekkert að slá slöku við. Maður þarf að sinna sínum störfum hér í HK,“ segir Valgeir Valgeirsson, leikmaður HK, en hann er aðeins 16 ára gamall og hefur slegið í gegn í sumar. Hann hefur spilað 11 leiki og skorað tvö mörk. Guttinn krækti svo í víti gegn FH á mánudag eftir að hafa sólað nánast hálft FH-liðið upp úr skónum. Guðmann Þórisson, varnarbuff FH, kippti löppunum undan honum og er trúlega enn að snúast í hringi inn í teignum eftir hreyfingu Valgeirs. Guðmann, sem mótmælir yfirleitt öllu, hvort sem það er tilefni til þess eða ekki reyndi ekki einu sinni að malda í móinn yfir dómi Þorvaldar Árnasonar sem hélt um flautuna.

Valgeir svífur þó ekki um á bleiku skýi. Hann er jarðbundinn drengur sem var mættur til að sinna fótboltaskóla HK þar sem hann er gríðarlega vinsæll meðal iðkenda. Einn bað hann meira að segja, þegar Valgeir var búinn með æfinguna og á leið í viðtalið, að fresta för sinni í atvinnumennsku svo að þeir gætu spilað saman í HK.

„Á undirbúningstímabilinu fékk ég nokkra leiki. Byrjaði tvo leiki og kom inn á í nánast hverjum leik. Svo fór ég á fund fyrir tímabilið með Brynjari Birni, þjálfara, og hann lofaði að ég myndi fá einhverjar mínútur. Ég tók því fegins hendi. Ég spilaði með öðrum flokki og reyndi að sanna mig þar líka til að Brynjar og Viktor Bjarki, aðstoðarþjálfari, gætu ekki litið fram hjá mér. Ég kom inn á gegn Víkingi og byrjaði á móti ÍA og alveg frá fyrstu mínútu var ég staðráðinn í að halda mér í liðinu. Að æfa aukalega og æfa af krafti og hafa trú á mér hefur skilað mér hingað finnst mér.“

Mamma tók mataræðið í gegn

Þrátt fyrir að vera aðeins 16 ára er Valgeir búinn að taka mataræði sitt algerlega í gegn. Móður hans leyst ekkert á blikuna og tók guttann á beinið. „Ég borðaði ekkert hollt í fjórða og þriðja flokki en mamma tók í mig og fór að láta mig borða hollara fæði. Ég hef fylgt því og mér finnst það hafa skilað miklu. Ég er í miklu betra formi eftir að ég fór að hlusta á mömmu,“ segir hann hress.

Hann segir einnig að hann sé yfirleitt mættur fyrr á aukaæfingar og noti enn tvær æfingar til að rekja boltann sem hann lærði í fjórða flokki. „Það er líka að skila sér. Ég er með æfingar sjálfur sem ég geri. Ég er að notast við æfingar sem Arnar Hallsson, núverandi þjálfari Aftureldingar, kenndi mér í fjórða flokki. Ég nota þær stöðugt.“

Viðureign Valgeirs og reynsluboltans Davíðs Þórs Viðarssonar vakti athygli í leiknum gegn FH en Davíð þurfti að grafa djúpt í reynslubankann til að reyna að skáka drengnum. „Ég hafði gaman af þessu. Ég er svolítið svona leikmaður og núna þegar maður er kominn með meira sjálfstraust í meistaraflokki þá þýðir ekkert annað en að rífa kjaft við þessa gæja. Láta finna aðeins fyrir sér og pirra þá. Ég fylgist vel með fótbolta og veit vel hver Davíð er og þetta var skemmtileg viðureign.

Ef maður ætlar að ná langt í fótbolta þá þarf að stríða þeim aðeins. Það þýðir ekkert að vera bara inni á vellinum og láta valta yfir sig heldur þarftu að sýna hvað í þér býr.“

Mikið breyst eftir fyrsta markið

Valgeir er alinn upp nálægt Fagralundi og bróðir hans þótti efnilegur knattspyrnumaður sjálfur. Hann segist vera mikill HK-ingur og styðji liðið í blíðu og stríðu. „Ég er HK-ingur fyrst og fremst og er ekkert að fara breyta um lið enda mikill HK-ingur í hjartanu þó fjölskyldan sé lítið í íþróttum. Bróðir minn var reyndar geggjaður í fótbolta en valdi lögfræðina. Elsti bróðir minn er lærður kvikmyndatökumaður og stjórnmálafræðingur, mamma er táknmálstúlkur og pabbi er bifreiðasmiður.

Á milli leikja þjálfar Valgeir í knattspyrnuskóla HK. Þar finnst honum gott að vera og strákarnir sem voru á æfingu þegar Fréttablaðið bar að garði vildu allir verða eins og hann. Feta í sömu fótspor. „Eftir markið gegn ÍA fóru allir að þekkja mig og sýna mér virðingu. Það er mjög skemmtilegt.

Þeir eru spenntir að sjá mig í fleiri leikjum og spyrja mikið um liðið og hvort ég sé ekki að fara að byrja og fleira.

Þeir eru glaðir að sjá mig koma á æfingar. Ég þekki líka marga í stúkunni þegar ég er að klappa fyrir áhorfendum eftir leiki. Þetta er alveg pínu skrýtið en samt skemmtilegt.“

Liggur ekkert á

Valgeir hefur verið orðaður við hin og þessi lið að undanförnu en hann er sjálfur ekkert að drífa sig burt. „Ég er orðinn partur af liði í efstu deild og er á mjög góðum stað í HK. Ég er hjá Total Football, þeir eru að sjá um mín mál en ég er ekkert að drífa mig. Hér er ég að spila með stóru strákunum og æfa undir handleiðslu þeirra Brynjars og Viktors.

Það er gott að hafa þá og Brynjar hefur verið okkur innan handar með næstu skref. Hann hefur hjálpað mér að einbeita mér að deildinni og setja fókusinn á hana en ekki á næstu skref. Enda liggur ekkert á.“