Vill að Boeing 737 MAX verði kyrrsett varanlega

Neytendafrömuðurinn Ralph Nader hvetur bandarísku flugmálastjórnina, FAA, til að kyrrsetja 737 MAX-þotu Boeing varanlega. Þetta sagði Nader í viðtali við CNBC sjónvarpsstöðina, sem tekur fram að frænka hans var meðal þeirra sem létust þegar MAX-þota fórst í Eþíópíu. 

„Það er ekki hægt að laga þessa flugvél. Það verður að innkalla hana og taka hana varanlega úr umferð,“ sagði Nader. 

MAX-vélarnar hafa verið kyrrsettar um allan heim frá því um miðjan marsmánuð eftir tvö flugslys sem kostuðu alls 346 manns lífið, annað í Eþíópíu en hitt í Indónesíu. Flugslysin hafa verið rakin til galla í hugbúnaði.

Ralph Nader sagði að flugvélaframleiðandinn yrði að taka á sig tjónið og ekki væri hægt að treysta honum fyrir lagfæringu hugbúnaðarins þar sem stjórnendur Boeing væru fastir í mistökum sínum. Þeir hefðu hunsað lykilatriði flugeðlisfræði við hönnun vélarinnar. 

„Í öllum þeim vörugöllum sem ég hef fengist við í gegnum tíðina hef ég aldrei séð svo marga viðurkennda flugsérfræðinga fordæma vinnubrögð Boeing,“ sagði Nader. 

„Flugmálastjórnin hefur verið í vasa Boeing árum saman, undir þrýstingi frá þinginu og Hvítahúsinu, sem skorið hafa niður fjárveitingar og starfsmannafjölda, og þannig dregið úr getu hennar til að hafa eftirlit með Boeing,“ sagði neytendafrömuðurinn við CNBC.