Mjög erfitt í Norðurá

Norðurá hefur komið afskaplega illa út úr hitanum og þurrkinum síðasta mánuðinn og þetta bitnar allsvakalega á veiðinni.

Það er ekkert hægt að koma öðrum orðum að því en að kalla þetta algjört neyðarástand vegna vatnsleysis í Norðurá en laxinn virðist bara hreinlega ekki treysta sér upp í hana í því ástandi sem hún er í. Veiði hófst þar 4. júní og þann 12. var ekki búið að skrá nema sjö laxa sem allir voru færðir til bókar opnunardaginn. Sem sagt engin lax skráður á átta dögum! Til samanburðar við opnun í fyrrasumar sem var þá erfið vegna mikils vatns þá var búið að bóka 95 laxa 13. júní í fyrra og þótti mönnum það bara ágætis gangur miðað við þau krefjandi skilyrði sem voru í ánni það sumarið.