Fyrrum konungur Belgíu samþykkir að veita lífsýni vegna faðernismáls

Albert II. konungur Belgíu sem ríkti frá 1993 til ársins 2013, þegar hann afsalaði sér völdum sökum versnandi heilsu, hefur samþykkt að veita lífsýni til faðernisprófs til að útkljá mál belgísku listakonunnar Delphine Boël. Guardian greinir frá.

Boël hefur í fjölda ára haldið því fram að hinn raunverulegi faðir hennar sé Albert II en Boël heldur því fram að konungurinn hafi haldið við móður hennar, barónessuna Sybille de Selys Longchamps á þeim tíma sem hún var getin.  Albert hefur aldrei neitað því opinberlega að hann sé faðir Boël en hefur ætíð hafnað því að veita lífsýni til rannsóknar.

Belgískur áfrýjunardómstóll úrskurðaði hins vegar fyrr í mánuðinum að Alberti væri skylt að veita  sýnið ellegar yrði hann sektaður um 5000 evrur daglega. Í yfirlýsingu frá lögfræðingi konungsins fyrrverandi sagði að vegna virðingar sem konungurinn ber í garð réttarkerfisins, hefði Albert ákveðið að virða óskirnar og veita lífsýni.

Lögfræðingur listakonunnar Delphine Boël sagði hana vera himinlifandi yfir því að sönnunargögnin sem varpa muni ljósi á uppruna hennar séu nú til staðar.

Albert II og eiginkona hans, Paola drottning eiga saman þrjú börn, Filippus sem nú er konungur Belgíu, Ástríði prinsessu og Lárens prins, öll eru þau eldri en hin 51 árs gamla Delphine Boël.