Karitas, er 18 ára gömul og stundar hún íslensku- og ritlistarnám við Háskóla Íslands og er hún að ljúka sínu fyrsta ári þar. Ljóðabókin, sem ber heitið o.s.frv. (og þar fram eftir götunum) er sú fjórða sem Karitas gefur út. Hinar þrjár, sem allar voru gefnar út árið 2018, báru heitin a.m.k. (ég hata þetta orðasamband), m.b.kv. (og fyrirfram þökk) og abba-hækurnar.
Hún er ein sjö ritstjóra Skandala, sem er nýtt íslenskt menningartímarit. Fyrsta tölublað þess mun koma út í lok maí og reikna þau með því að það verði gefið út einu sinni að hausti og einu sinni að vori. Í samtali við vísi segir hún þetta aðallega verða vettvang fyrir ljóð og texta sem fólk viti ekki hvað gera eigi við.
Bókin, sem koma mun út í næstu viku verður um 16 bls. á lengd. Karitas segir hana vera í svipuðum stíl og hennar fyrri bækur en „þetta er eina bókin sem ekki er skrifuð í ástarsorg.“
Með fylgjandi er ljóð sem verður birt í o.s.frv. (og þar fram eftir götunum).
þú horfðir á mig dansa og skammaðist þín.
poupée de cire, poupée di son.
ég kunni að dansa og ekki þið,
en þú sagðir mér seinna,
að það hefði ekki pirrað ykkur,
því ég gæti allavega ekki sungið.
poupée de cire, poupée de son.
og þú lýstir mér svo fallega,
vaxdúkka, sönfuglinn þinn,
og um tíma hélt ég að ég væri þú
og þú værir ég
en svo var víst ekki
og við erum bara báðar vaxdúkkur
