Ríkið bjóði upp á eiginfjárlán til íbúðarkaupa á lágum vöxtum

Ungu fólki sem er að kaupa sína fyrstu íbúð verður gefinn kostur á sérstökum eiginfjárlánum sem verða með lágum vöxtum í fimm ár ofan á önnur hefðbundin húnsæðislán til að auðvelda því að komast í eigið húsnæði. Þá verða lög um ráðstöfun séreignarsparnaðar til húsnæðiskaupa rýmkuð og fólki sem missti húsnæði sitt í hruninu gert auðveldara að eignast nýjar íbúðir.

Félagsmálaráðherra skipaði starfshóp á síðasta ári til að gera tillögur um hvernig mætti auðvelda tekjulágum og ungu fólki að komast inn á húsnæðismarkaðinn undir formennsku Frosta Sigurjónssonar.

Tillögur starfshópsins eru margar og ólíkar. En þær miða allar að því að auðvelda fólki, þá sérstaklega ungu fólki, fyrstu kaup á íbúðum. Sumar þessara tillagna hafa nú þegar komið til framkvæmda.

Ein af fjórtán tillögum starfshópsins er að ríkið veiti startlán með háum veðhlutföllum og hagstæðum kjörum til afmarkaðra hópa. Önnur tillaga er um svo kölluð eiginfjárlán til þeirra sem eiga erfitt með að brúa það bil sem lánastofnanir lána ekki fyrir. Slík lán gætu numið allt að 15 til 30% af kaupverði og væru án afborgana.

Ásmundur Einar Daðason félagsmálaráðherra segir stjórnvöld horfa sérstaklega til þessarar tillögu.

„Við erum auðvitað búin að eiga samtal við aðila vinnumarkaðarins um ákveðnar tillögur sem þarna eru. Við erum sammála um að skoða til dæmis þessi eiginfjárlán áfram. Við erum líka sammála um það sem snýr að lífeyrissparnaðinum. Menn geti nýtt hluta af sínum lífeyrissparnaði inn á fasteignalán,” segir Ásmundur Einar.

Það hefur fólk getað gert með séreignarsparnað sinn frá árinu 2015 og verður það úrræði framlengt um tvö ár. Þá verður fólki einnig gert kleift að nýta svo kallaða tilgreinda séreign upp á 3,5 prósent af launum skattfrjálst til húsnæðiskaupa. Ráðherra segir að nú þurfi að fara yfir tillögur starfshópsins og leggja síðan fram frumvörp vegna þeirra tillagna sem teknar verði upp á haustþingi. Breytingar leiði til að húsnæðiskostnaður verði aldrei meiri en 25 prósent af tekjum.

„Markmiðið núna í heildaraðgerðum um húsnæðismálanna er að okkur takist í fyrsta lagi að húsnæðisverðið sé ekki sá þáttur sem rjúfi þá sátt sem búið er að mynda. Það held ég að allar tillögurnar sem búið er að vinna í húsnæðismálum geri. Síðan að við tökum sérstaklega utanum þessa tekjulægri hópa. Sama hvort þeir eru á leigumarkaði eða vilji komast í eigið húsnæði,” segir Ásmundur Einar.    

Þá verði þeim sem misstu húsnæði sitt í hruninu gert kleift að nýta úrræði fyrstu kaupenda hafi þeir ekki átt húsnæði í tvö ár segir í tillögum hópsins, en fimm ár samkvæmt tillögum sem ríkisstjórnin kynnti í fyrrakvöld.

Hér má sjá tillögur hópsins í heild sinni.