Guðmundur: Erum að spila á okkar heimavelli og viljum gjarnan vinna leikinn

Guðmundur Guðmundsson, landsliðsþjálfari, segir að allir leikmenn liðsins séu klárir í slaginn fyrir leikina gegn Norður-Makedóníu.

Ísland mætir Norður-Makedóníu í tveimur leikjum í vikunni. Fyrri leikurinn fer fram í Laugardalshöllinni á miðvikudagskvöldið en síðari leikurinn í Makedóníu á sunnudag en leikirnir eru liður í undankeppni EM 2020.

„Við erum að spila á okkar heimavelli og við viljum gjarnan vinna leikinn en það verður ekki einfalt. Þetta er mjög sterkt lið og reynslumikið. Þeir eru líkamlega sterkir og búa yfir ýmis konar vopnabúri,“ sagði Guðmundur í samtali við Arnar Björnsson.

„Þeir hafa verið að spila mikið sjö á sex og við þurfum að leysa það. Þeir eru með öflugar skyttur og frábæra línumenn og góðan markmann. Það er eitt og annað en svo er kominn nýr þjálfari og þá koma áherslubreytingar sem við vitum ekki nákvæmlega hverjar eru.“

Ísland er með fjögur stig eftir fyrstu tvo leikina í riðlinum en Norður-Makedónía einungis tvö, svo þeir þurfa nauðsynlega á stigunum tveimur að halda á miðvikudaginn.

„Þetta verður hörkuleikur. Þetta verður spennandi verkefni og við erum búnir að spila marga leiki við þá. Þetta hafa eiginlega alltaf verið jafnar viðureignir og ég á von á því að þetta verði þannig. Við munum gera allt í okkar valdi til þess að vinna.“

Guðmundur hvetur stuðningsmenn til að fjölmennina í Höllina og segir að það geti verið mikilvægt.

„Það er skemmtilegt að spila á heimavelli. Vonandi fáum við fulla höll og það verður góð stemning. Það hefur oft verið hérna. Við þurfum á því að halda að fá hörku stemningu í Höllina og þá verður þetta skemmtilegt.“

Viðtalið við Guðmund í heild sinni má sjá hér að neðan en þar ræðir hann meðal annars um standið á hópnum, ákvörðunina að gefa Aroni frí á æfingu í dag og margt fleira.