Hundruð þúsunda mótmæla Brexit á götum Lundúna

Herskari mótmælenda marserar nú um miðbæ Lundúna í mótmlæagöngu undir yfirskriftinni Put It To The People, eða „Leyfið fólkinu að ráða.“ Mótmælendur beina spjótum sínum að fyrirhugaðri útgöngu Bretlands úr Evrópusambandinu, Brexit, og krefjast nýrrar þjóðaratkvæðagreiðslu um málið.

Ljóst er að hundruð þúsunda eru saman komin í göngunni sem fer gegnum miðborg Lundúna og endar við þinghúsið. Óstaðfestar fregnir herma að yfir milljón sé saman komin á mótmælunum, en það er svipaður fjöldi og kom saman í miðborginni árið 2003 til þess að mótmæla Íraksstríðinu.

Mótmælin koma í kjölfar samnings milli Bretlands og ESB um að fresta fyrirhugaðri útgöngu Breta úr sambandinu, sem upphaflega var fyrirhugað að ætti sér stað næsta föstudag, 29. mars.

Sadiq Khan, borgarstjóri Lundúna, var mættur í mótmælagönguna og tísti stuttu myndbandi af sér þar sem hann hélt uppi borða með slagorði mótmælanna.

„Hér í Lundúnum eru þúsundir fólks úr borginni okkar og hvaðanæva af landinu saman komið til þess að senda skýr skilaboð: Nú er nóg komið. Það er kominn tími til að leyfa breskum almenningi að eiga lokaorðið um Brexit.“

Undirskriftasöfnun á vefsíðu breska þingsins þar sem kallað er eftir því að hætt verði við Brexit hefur fengið byr undir báða vængi en þegar þetta er skrifað hafa 4,3 milljónir skrifað undir hana og er það mesti fjöldi sem sett hefur nafn sitt undirskriftasöfnun á vefsíðu þingsins.

Upphafskona söfnunarinnar, Margaret Georgiadou segist hafa fengið líflátshótanir símleiðis og holskeflu af hatursskilaboðum á Facebook vegna undirskriftasöfnunarinnar.

Bretar samþykktu í þjóðaratkvæðagreiðslu þann 23. júní 2016 að ganga út úr Evrópusambandinu. Mjótt var á munum en lokaniðurstaðan var sú að tæp 52% greiddu atkvæði með útgöngu. David Cameron, þáverandi forsætisráðherra, sagði af sér í kjölfarið og við tók mikil þrautaganga breskra stjórnvalda í útgönguferlinu og samningaviðræðum við Evrópusambandið sem enn sér ekki fyrir endann á.

Verði samningur Theresu May forsætisráðherra við Evrópusambandið ekki samþykktur af breska þinginu, er Bretum gert að yfirgefa Evrópusambandið þann 12. apríl næstkomandi, aðeins tveimur vikum síðar en ráðgert hefur verið til þessa. Fari svo gæti verið að Bretland yfirgefi sambandið án nokkurs samnings.

Verði samningurinn samþykktur fæst fresturinn hins vegar framlengdur til 22. maí. May hefur hins vegar gefið það út að óvíst sé hvort hún leggi samninginn fyrir þingið, en það yrði í þriðja sinn sem þingið greiddi atkvæði um sömu samningsdrög. Margir hafa kallað eftir afsögn May vegna þessa.

Forsætisráðherraskrifstofan að Downing-stræti 10 hefur hafnað fullyrðingum sem koma fram í umfjöllun the Times, þar sem fram kemur að þegar sé búið að leggja drög að tímaáætlun er snýr að afsögn May.