Greiða at­kvæði um út­gönguna sjálfa

Breskir þingmenn munu í dag greiða atkvæði um útgöngusamning Theresu May en hún reynir nú allt sem hún getur til að fresta útgöngu Breta úr ESB fram til 22. maí. Ef enginn útgöngusamningur verður samþykktur fara Bretar út 12. apríl.

May mun þó ekki láta greiða atkvæði um samning sinn í heild, heldur aðeins um það sem snýr að sjálfri útgöngunni, ekki um framtíðarsamskipti Breta og ESB.

Ráðherrar segja þó að verði þessi hluti samþykktur ætti það að nægja til að uppfylla kröfur ESB og að þannig fáist fresturinn framlengdur.

Samningur hennar hefur þegar verið felldur með miklum mun tvívegis og hefur May nú lofað að segja af sér, verði samningurinn samþykktur.