Grunaður um að hafa myrt móður sína í Ósló

Lögregla í Ósló í Noregi hefur handtekið karlmann á fertugsaldri vegna gruns um að hafa myrt móður sína í nótt.

Lögregla var kölluð út að blokkaríbúð í hverfinu Ellingsrud í austurhluta norsku höfuðborgarinnar klukkan 4:30 að staðartíma í morgun.

„Það var karlmaður og kona í íbúðinni. Konan var úrskurðuð látin á staðnum,“ sagði yfirlögregluþjónninn Anne Alræk Solem á blaðamannafundi lögreglu í morgun.

Í frétt NRK segir að bæði mæðginin séu norskir ríkisborgarar og búsett í Ósló. Lögregla vildi ekkert segja til um hvaða ástæður kunni að liggja að baki morðinu.