Enginn fengið rautt oftar en Ramos

Sergio Ramos náði sér í miður skemmtilegt met í dag þegar hann fékk að líta rauða spjaldið í leik Real Madrid og Girona í La Liga deildinni.

Spjaldið sem Ramos fékk var það tuttugasta og fimmta á ferlinum sem gerir hann að rauðasta manni Evrópu.

Ramos átti nú þegar metið yfir flest rauð spjöld á ferlinum í La Liga deildinni en nú er hann sá maður sem hefur fengið flest rauð spjöld allra í fimm stærstu deildum Evrópu.

Cyril Rool, fyrrum leikmaður Bordeaux, Nice og Marseille, átti metið með 19 spjöld í frönsku úrvalsdeildinni. Spjald Ramos í dag var hans tuttugasta í La Liga.

Hin fimm spjöldin á félagsliðaferlinum komu í Meistaradeild Evrópu og spænsku bikarkeppninni.

Þó ótrúlegt megi virðast hefur Ramos aldrei fengið að líta rauða spjaldið í landsleik, en hann á að baki 161 landsleik fyrir Spán.