„Þú ferð á stað þar sem enginn getur snert eða meitt þig“

Hjúkrunarfræðingurinn Sigríður A. Pálmadóttir ákvað eftir 40 ára vinnu sem hjúkrunarfræðingur að bæta við sig dáleiðslunámi og í dag kennir hún fólki sjálfsdáleiðslu.

Það gerir hún til þess að nota sem aðferð og tækni við að takast á við ýmis vandamál sem það er að kljást við.

Og nú í dimmasta og mesta streitutíma ársins rétt fyrir jólin eru margir sem leita til Sigríðar til að fá hjálp.

Vala Matt hitti Sigríði í Íslandi í dag og ræddi við hana um dáleiðslu.

Einn af þeim sem hafa fengið ómetanlega aðstoð hjá Sigríði er hann Gabríel Filippusson Patey sem leitaði til hennar eftir áfall sem hann varð fyrir. Í dag er hann allur annar og segist líða mun betur.

Alveg out og lamaður

„Ég var að díla við skilnað sem var stórt högg á eggóið og sálina. Hún dáleiddi mig og við fórum í fortíðina og fann rótina að vandamálinu,“ segir Gabríel.

„Hún getur það og fer svona inn í mann. Í miðri dáleiðslu getur maður svarað með puttunum, þú getur ekki talað og ert alveg out og lamaður. Þar fórum við í gegnum þessar tilfinningar eins og höfnunartilfinningar, þar sem mér var hafnað alveg stórkostlega. Þú tekur þetta fólk sem særir þig og setur einhverskonar slæðu yfir það. Þú ferð á stað þar sem enginn getur snert eða meitt þig. Þú velur þinn stað.“

Hann segir að sinn verndarstaður sé eyðieyja.

„Þetta er ótrúlegt. Strax eftir fyrsta tímann þá leið mér bara eins og hún hefði rassskellt mig. Ég kom út alveg fullur af orku og jákvæðni. Hún sagði bara að þegar ég vaknaði á eftir væri kvíðinn farinn út þennan dag, kannski út vikuna og þú ferð og gerir alla þá hluti sem þú ert búinn að trassa við í langan tíma,“ segir Gabríel en hér að neðan má sjá innslagið í heild sinni.