„Mjög kröpp lægð“ á hraðferð í átt að landinu

Blautt og vindasamt verður víða um land í dag. Mjög kröpp lægð hreyfist nú hratt í norður og nálgast landið, með tilheyrandi hvassviðri í kvöld, en áhrifa lægðarinnar gætir einkum á morgun. Þetta kemur fram í hugleiðingum veðurfræðings á vef Veðurstofu Íslands.

Í dag er búist við sunnan- og suðaustanstrekkingsvindi og skúrum víða um land. Bæði úrkomu og vind hægir þegar líður á daginn og kólnar í veðri. Þá verður bjartviðri á Norður- og Austurlandi og hiti fimm til tíu stig. Kröpp lægð hreyfist jafnframt hratt norður á bóginn og í kvöld og nótt mun hvessa af suðaustri þegar hún nálgast landið.

„Á morgun siglir lægðin þvert yfir land og gengur þá í suðaustanhvassviðri eða -stormi og rignir víða, nema fyrir norðan þar sem helst þurrt lengst af. Hlýnar aftur í veðri og síðan áfram stíf suðaustanátt og vætusamt fram á helgi, en úrkomulaust að kalla á Norðurlandi,“ segir í hugleiðingum veðurfræðings.

Veðurhorfur á landinu næstu daga:

Á föstudag:

Vaxandi suðaustanátt, 15-23 m/s síðdegis, hvassast syðst. Talsverð rigning um landið suðaustanvert, en úrkomulítið norðan- og vestanlands. Hiti víða 3 til 8 stig.

Á laugardag:

Hvöss suðaustanátt og skúrir, en þurrt að mestu um landið norðanvert. Heldur hægari vindur síðdegis. Hiti 0 til 5 stig.

Á sunnudag:

Austlæg átt 8-13 m/s, en hægari um landið norðaustanvert. Dálítil væta sunnan- og austanlands, en annars þurrt. Hiti 0 til 5 stig, en um frostmark fyrir norðan.

Á mánudag:

Austlæg átt og skúrir eða él í flestum landshlutum. Hiti 0 til 5 stig við suðurströndina, en annars kringum frostmark.

Á þriðjudag:

Útlit fyrir vaxandi austanátt með rigningu og hlýnandi veðri.